İstanbulda XXIII dünya enerji konqresi keçiriləcək - FOTO

İstanbul. 9 oktyabr. REPORT.AZ/ Türkiyənin İstanbul şəhərində dünya enerji sammiti öz işinə başlayacaq.

"Report"un Türkiyə bürosunun məlumatına görə, 80 ölkədən 50 ölkə başçısının, 54 baş nazirinin, ümumilikdə 266 dövlət rəsmisinin qatıldığı sammitdə TANAP, TAP və "Türk axını" kimi nəhəng layihələrin müzakirəsi keçiriləcək.

Tədbir “Yeni üfüqləri qucaqlayaq” şüarı ilə keçirilir. Sammitin təşkil olunduğu ərazidə təhlükəsizlik tədbirləri gücləndirilib.

Beynəlxalq tədbirin açılışını oktyabrın 10-da Türkiyə prezidenti Rəcəb Tayyip Ərdoğan və baş nazir Binəli Yıldırım edəcək.

Sammitdə Azərbaycan nümayəndələri də yer alıb. Belə ki, Azərbaycan Respublikası Dövlət Neft Şirkətinin prezidenti Rövnəq Abdullayev beynəlxalq tədbirdə çıxış edəcək.