Yuxarı

​Türkiyə rəhbərliyi Bundestaqın qərarına münasibət bildirib

Türkiyə baş nazirinin müavini: Bu qərara bütün sahələr üzrə lazımi cavabı verəcəyik

Bakı. 2 iyun. REPORT.AZ/ "Ölkəyə döndükdən sonra bu məsələni müzakirə edib, lazımi qərarı verəcəyik".

"Report" xəbər verir ki, bunu Keniyada səfərdə olan Türkiyə Prezidenti Rəcəb Tayyib Ərdoğan keçirdiyi mətbuat konfransında Almaniya Bundestaqının 1915-ci ildə Osmanlı dövlətində baş vermiş hadisə ilə bağlı qəbul etdiyi qətnamə haqqında jurnalistin sualını cavablandırarkən deyib.

"Almaniyadakı səfirimizi Türkiyəyə çağırdıq. Almaniya parlamentinin qəbul etdiyi qətnamə iki ölkənin əlaqələrinə mənfi təsir göstərəcək qərardır", - deyə Türkiyə prezidenti vurğulayıb.

Baş nazirin müavini Numan Kurtulmuş "Twitter" səhifəsində Bundestaqın 1915-ci ildə Osmanlı dövlətində baş vermiş hadisə ilə bağlı qəbul etdiyi qətnaməyə münasibət bildirərkən yazıb: "Almaniya Bundestaqının təhrif edilmiş və əsassız iddiaları "soyqırımı" olaraq qəbul etməsi və layihəyə səs verməsi tarixi bir xətadır. Almaniya parlamentinin bu qətnaməsi Türkiyə-Almaniya dostluq əlaqələrinə yaraşan qərar deyil. Türkiyə üçün bu qərar heçdir. Bu məsələ siyasətçilərin və ya parlamentlərin deyil, elm adamlarının, tarixçilərin müzakirə edəcəyi məsələdir. Türkiyə bu qərara bütün sahələr üzrə lazımi cavabı verəcək". 

Türkiyənin xarici işlər naziri Mövlud Çavuşoğlu "Twitter" səhifəsində qətnaməyə belə münasibət bildirib: "Öz tarixlərindəki qaranlıq səhifələri ört-basdır etmək üçün Bundestaq məsuliyyətsiz və əsassız qərar qəbul edərək, başqa ölkələrin tarixini qaralayır".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi