Yuxarı

​Saakaşvili Gürcüstanın indiki hakimiyyətini istefa verməyə çağırıb

Gürcüstanın keçmiş prezidenti: Bu gələcəyi heç bir daxili və xarici qüvvə bizdən ala bilməz

Bakı. 24 oktyabr. REPORT.AZ/ ""İmedi" televiziya kanalının bağlanması ilə bağlı hadisədə istefa verdiyim kimi Gürcüstanın indiki hakimiyyəti də oxşar addım atmalıdır".

"Report" Gürcüstan KİV-inə istinadən xəbər verir ki, bunu ölkənin keçmiş prezdenti, Ukraynanın Odessa vilayətinin başçısı Mixeil Saakaşvili "Rustavi-2" telekanalı ətrafında baş verən hadisə ilə bağlı bəyanatında bildirib.

"Gürcüstan üçün ağır günlərdir. Bizi yenidən bataqlığa sürükləmək istəyirlər. Heç bir şər qüvvə millətimizin azad sözə olan sevgisini öldürməyə cəhd edə bilməz. Biz bütün maneələri aşacağıq. "Rustavi-2" və Gürcüstan azad olacaq. Biz unutmamalıyıq ki, yalana sığınan şər qüvvələr zəifdir. Ona görə də onlardan qorxmaq lazım deyil. Sizi qorxutmaq üçün onların əlində heç nə yoxdur. Mən Gürcüstan cəmiyyətinin müdrikliyinə, o cümlədən gənclərimizin vətənsevərliyinə və azadlığa sevgisinə inanıram. Söz azadlığına məhdudiyyət qoymaq cəhdi məğlubiyyətə məhkumdur", - deyə keçmiş prezident vurğulayıb.

O, "Rustavi-2" telekanalına toxunmamağı məsləhət görüb: "Bu telekanal söz azadlığının simvoludur. Əlbəttə, biz yaxşı gələcəyə sahib olmaq istəyirik. Bu gələcəyi heç bir daxili və xarici qüvvə bizdən ala bilməz. Əminəm ki, Gürcüstan və söz azadlığı qalib gələcək".

Qeyd edək ki, son günlər "Rustavi-2" telekanalının bağlanması ilə bağlı məhkəmə prosesi gedir. Ölkə ictimaiyyəti onun qapadılmasına etiraz olaraq aksiya keçirir. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi