Qazaxıstanın keçmiş bank sahibinə 20 il qiyabi iş kəsilib

Bakı. 7 iyun. REPORT.AZ/ Qazaxıstanın Almatı şəhər məhkəməsi yerli “BTA-bank”ın keçmiş sahibi Muxtar Ablayzovun əmlakı müsadirə edilməklə 20 il azadlıqdan məhrum olunması barədə qiyabi hökm çıxarıb.

“Report” BBC-yə istinadən xəbər verir ki, o, “cinayətkar təşkilat yaratmaq” və “bankın vəsaitini mənimsəmək” maddələri əsasında mühakimə olunub.

O, Qazaxıstan müxalifətinin əhəmiyyətli fiqurlarından sayılır. Məhkəmə onun iştirakı olmadan keçirilib. Muxtar Ablayzov 2009-cu ildə bankı müflis elan edildikdən və milliləşdirildikdən sonra Qazaxıstanı tərk edib. O, 1990-cı illərin sonunda Qazaxıstanın energetika, sənaye və ticarət naziri olub və hökumətdə müxtəlif vəzifələrdə işləyib. 2001-ci ilin payızında istefa verdikdən sonra “Qazaxıstanın demokratik seçkiləri” müxalifət hərəkatına başçılıq edib. 2002-ci ildə Qazaxıstan məhkəməsi M.Ablayzovu 3,6 milyon dollar məbləğində cərimələyərək 6 il azadlıqdan məhrum edib. Bir ildən sonra ölkə prezidenti onun barəsində əfv fərmanı imzalayıb. 2009-cu ildə Qazaxıstan və Rusiya onu 70 milyard dollar məbləğində mənimsəmədə ittiham edib. “BTA-bank”ın Ukraynadakı fəaliyyətinə rəsmi Kiyevin də etirazı olub. 2011-ci ildə Britanya ona siyasi sığınacaq verib. Ancaq 2012-ci ildə məhkəməyə hörmət etmədiyi üçün Londonun Ali Məhkəməsi keçmiş bank sahibini 22 ay azadlıqdan məhrum edib. M.Ablayzov 2013-cü ildə isə Rusiya, Ukrayna və Qazaxıstanın tələbi əsasında Fransada həbs olunub. Fransanın Dövlət Şurası onun ekstradisiyasını rədd edib və müxalifətdə olan keçmiş maliyyə oliqarxı azadlığa çıxıb.