Moskva həbsxanasında “Roskosmos”un keçmiş icraçı direktorunun meyiti tapılıb

Bakı. 18 mart. REPORT.AZ/ Moskvada istintaq təcridxanasında Rusiyanın “Roskosmos” dövlət şirkətinin keçmiş icraçı direktoru Vladimir Yevdokimovun meyiti aşkar edilib.

“Report” TASS-a istinadən xəbər verir ki, bu barədə Moskva üzrə İstintaq Baş İdarəsinin mətbuat xidmətinin təmsilçisi Yuliya İvanova bildirib.

“1965-ci il təvəllüdlü kişinin meyitinə baxış zamanı ürək nahiyəsindən iki bıçaq yarası aşkar edilib”, - deyə o vurğulayıb.

Məlumata görə, V.Yedokimov ötən ilin dekabrında tutulub. O, “MiQ” “Rusiya təyyarə-tikinti şirkəti” Açıq Tipli Səhmdar Cəmiyyətinə 200 milyon rubl (3 milyon 464 min 713 dollar, yaxud 5 milyon 960 min manat) ziyan vurmaqda ittiham olunurdu.

Faktla bağlı istintaq başlayıb.