KİV: Terrorçu Xattab zəhərlənmiş məktubdan ölüb

Bakı. 8 yanvar. REPORT.AZ/ Beynəlxalq terrorçu Xattab Çeçenistanda zəhər vasitəsilə öldürülüb.

"Report" xəbər verir ki, bu barədə "Rosbalt"a hadisə ilə bilavasitə əlaqəli olan mənbə bildirib.

Silahlının məhv edilməsi onun yerini daim dəyişməsi və əlaqə vasitələrinə güvənməməsi ilə mürəkkəb hal almışdı. O, xarici dünya ilə kuryerlər tərəfindən zəncirvari ötürülən məktublarla əlaqə qururdu.

Xüsusi xidmət orqanlarının Xattab haqqında məlumat üçün mükafat veriləcəyini elan etməsindən sonra kuryerlerden biri əməkdaşlıq etməyə razılıq verib. O, 2002-ci ilin mart ayında Səudiyyə Ərəbistanından məktub alınması barədə məlumat verib və Moskvadan təcili gətirilmiş kimyaçı-mütəxəssis məktuba güclü zəhər "əlavə edib".

Sonradan sorğu-sual zamanı Xattabın mühafizəçisi onun məktub aldığını, açıb oxuduğunu və sonra ocağın üstünə atdığını bildirib. Zəhər üçüncü gün təsir etməyə başlayıb: terrorçunun vəziyyəti qəfil pisləşib və o, 2002-ci il martın 20-də vəfat edib.

Əvvəlcə Xattabın əhatəsi liderlərinin yediyi göbələkdən zəhərləndiyini düşünüb. Amma sonradan məktub zərfinə toxunan daha 5 nəfərin ölməsi ilə məsələ aydınlaşıb.