Bakı. 13 oktyabr. REPORT.AZ/ İstanbul metrosunun "Taksim" stansiyası bağlanıb.
"Report" xəbər verir ki, bu haqda Türkiyə KİV-i məlumat yayıb.
Məlumata görə, metronun girişinə təcili tibbi yardım maşınları və polis əməkdaşları cəlb edilib.
Sərnişinlər polislərin müşayiəti ilə stansiyadan çölə çıxarılıb. Bundan başqa, Taksim-Kabataş funiklyor xəttinin dayandırıldığı da bildirilib.
Rəsmi nümayəndələr bildirib ki, Taksim metro stansiyası elektrik enerjisinin kəsilməsi səbəbindən bağlanıb. Qeyd edək ki, oktyabrın 13-də səhər saatlarından bu stansiyada şübhəli zərf və şəxslərin olması ilə bağlı çox saylı xəbərlər də yayılıb.