Yuxarı

​Ermənilər Rusiyanın Yerevandakı səfirliyinin binası qarşısında etiraz aksiyası keçirəcək

Bu, son 10 gündə ermənilərin üçüncü etiraz aksiyasıdır

Bakı. 18 aprel. REPORT.AZ/ Sabah ermənilər Rusiyanın Yerevandakı səfirliyinin binası qarşısında erməni iş adamı Levon Ayrapetyanın azadlıqdan məhrum edilməsinə etiraz olaraq aksiya keçirəcək.

"Report" xəbər verir ki, bu haqda Ermənistan KİV-i məlumat yayıb.

Moskvanın Zamoskvoretsk məhkəməsi Levon Ayrapetyanı 700 min dollarlıq maliyyə fırıldağında təqsirli bilərək, 4 il müddətinə azadlıqdan məhrum edib. Məhkəmə hökmünə əsasən, o, cəzasını ümumi rejim islah əmək koloniyasında çəkəcək.

Bu, son 10 gündə Rusiyanın səfirliyinin binası qarşısında ermənilərin keçirdiyi üçüncü etiraz aksiyasıdır. Bundan əvvəlki aksiyada onlar səfirliyin binasını yumurta "atəşinə" tutmuşdu. Həmin iki aksiyada ermənilər Rusiyanın Azərbaycana silah satmasına etiraz ediblər.

Qeyd edək ki, Levon Ayrapetyanın terrorçuluğa və digər ağır cinayətlərə görə ömürlük azadlıqdan məhrum olunan eks-senator İqor İzmestiyevin anasından oğlu barəsində çıxarılan məhkəmə qərarının yumşaldılması qarşılığında 700 min ABŞ dolları alıb.

L.Ayrapetyana qarşı bundan əvvəl də cinayət işi açılıb. O, Başqırdıstanın "Başneft" şirkətinin işi ilə əlaqədar mənimsəmə və çirkli pulların yuyulmasında ittiham olunub.

Xatırladaq ki, o, Dağlıq Qarabağdakı separatçı rejimin əsas sponsorlarındandır. L.Ayrapetyanın ikili vətəndaşlığı və xaricdə daşınmaz əmlakları var.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi