Yuxarı
    Bağlamaq

    Berlində Xocalı soyqırımının 25-ci ildönümünə həsr olunan tədbir keçirilib

    Bakı. 25 fevral. REPORT.AZ/ Almaniyada Xocalı soyqırımının 25-ci ildönümünə həsr olunan silsilə tədbirlər çərçivəsində növbəti müzakirələr fevralın...

    Bakı. 25 fevral. REPORT.AZ/ Almaniyada Xocalı soyqırımının 25-ci ildönümünə həsr olunan silsilə tədbirlər çərçivəsində növbəti müzakirələr fevralın 24-də  Berlindəki Türk Alman Sahibkarlar Birliyinin ofisində Türk-Azərbaycan Birliyi və Atatürkçü Düşüncə Dərnəyi tərəfindən təşkil olunub.

    "Report" xəbər verir ki,  Azərbaycanın Almaniyadakı fövqəladə və səlahiyyətli səfiri Ramin Həsənov tədbirdə çıxış edib.

    Səfir Ermənistan-Azərbaycan Dağlıq Qarabağ münaqişəsindən, Azərbaycan xalqının qan yaddaşında Xocalı soyqırımının yerindən bəhs edib. R.Həsənov Azərbaycan və türk diasporlarının Qarabağ həqiqətlərinin dünyaya tanıtdırılması işində rolunu vurğulayıb və onların gələcəkdə bu istiqamətdə fəaliyyətlərinin əlaqələndirilməsinin vacibliyini qeyd edib.

    Türkiyə Respublikasının AFR-dəki səfirinin birinci müşaviri Nuray İnöntəpə çıxış edərək Türkiyə Xarici İşlər Nazirliyinin Xocalı soyqırımına dair verdiyi bəyanatı səsləndirib. N.İnöntəpə Xocalı soyqırımını insanlığa qarşı törədilmiş cinayət adlandırıb.

    Tədbirdə azərbaycanlı yazıçı və publisist Səriyə Cəfərovanın müəllifi olduğu Xocalı soyqırımının qurbanları haqqında “Onlar daha böyüməyəcəklər” filmi, eləcə də kinematoqraf Məsud Pənahinin rəhbərliyi ilə Almaniyada çəkilmiş Xocalı soyıqırımına dair cizgi filmi nümayiş etdirilib. Xocalı soyqırımının canlı şahidi olan S.Cəfərova həmin hadisələrdən olan acı xatirələrini tədbir iştirakçıları ilə bölüşüb.

    Tədbirdə Türkiyənin Berlindəki Baş Konsulu Mustafa Çəlik, Türk-Azərbaycan Birliyinin rəhbəri, Bundestaqın keçmiş deputatı Hakkı Kəskin, Türk Alman Sahibkarlar Birliyinin rəhbəri Bahəddin Kaya, Azərbaycanın Almaniyadakı səfirliyinin əməkdaşları, Azərbaycan və türk diasporlarının təmsilçiləri iştirak ediblər. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi