Bakı. 27 may. REPORT.AZ/ “Türkiyə bizim üçün daha böyük bir dövlət oldu. Amacımız hər kəsin türkcə danışması, insanların Türkiyəni sevməsidir".
"Report" Türkiyə KİV-inə istindən xəbər verir ki, bunu Türk Dünyası Araşdırmalar Vəqfi tərəfindən Türkiyənin Bağcılar bələdiyyəsinin ev sahibliyi etdiyi 21-ci Türk Dünyası Uşaqlar Festivalında içtirak edən azərbaycanlı şagird Cəmilə Osmanova deyib.
Məlumata görə, festivala 35 ölkədən 500-ə yaxın şagird qatılıb.
Bağcılar bələdiyyəsinin sədri Loğman Çağırcı tədbirlə bağlı bunları deyib: "Gələcəyimiz olan sizlər türk coğrafiyasının hər yerindən olan qardaşlarımızla tanış olmaq, biri-birinə qaynayıb-qarışmaq, Türkiyəni tanımaq üçün burdasınız".
Digər azərbaycanlı şagird Tamilla Danyarbəyli bunları söyləyib: "Yeganə arzum Türk Dünyası və hamımızın birlikdə olmasıdır. Böyük bir dövlət quraq, hamımız bir yerdə olaq".
Azərbaycan Atatürk Liseyinin şagirdi Arzu Quliyeva isə bunları deyib: "13 nəfərlik bir heyətlə bura gəlmişik. Məqsədimiz türk qardaşlığını daha da möhkəmləndirmək, qardaşlarımzı yaxından tanımaqdır".
Qeyd edək ki, bu ənənənin bünövrəsini vəqfin mərhum qurucusu Turan Yazqan qoyub.