Ukraynanın Ali Radası Putinlə bağlı daha bir qərar hazırlayır

Ukraynanın Ali Radası Putinlə bağlı daha bir qərar hazırlayır Ukraynanın Ali Radası beşinci dəfə Rusiya prezidenti seçilmiş Vladimir Putinin qeyri-legitimliyinə dair qərar hazırlayır.
Region
20 Mart , 2024 08:28
Ukraynanın Ali Radası Putinlə bağlı daha bir qərar hazırlayır

Ukraynanın Ali Radası beşinci dəfə Rusiya prezidenti seçilmiş Vladimir Putinin qeyri-legitimliyinə dair qərar hazırlayır.

“Report” xəbər verir ki, bu barədə Ali Radanın Xarici Siyasət və Parlamentlərarası Əməkdaşlıq Komitəsinin sədri, xalq deputatı Oleksandr Merejko “Azadlıq Radiosu”nun efirində açıqlayıb.

Merejko qeyd edib ki, Kiyev Rusiyadakı seçkilərin legitimliyini tanımır. Onun sözlərinə görə, Rada artıq bu seçkilərin beynəlxalq cinayət kimi qiymətləndirilməsi barədə qərar qəbul edib.

“Hüquqi nöqteyi-nəzərdən söhbət cinayətdən gedir”, – xalq deputatı bildirib.

Bundan başqa, Merejkonun sözlərinə görə, deputatlar Putinin legitim prezident kimi tanınmamasını əks etdirən daha bir qərar hazırlayırlar.

Müraciətin təşəbbüskarları Xarici siyasət və parlamentlərarası əməkdaşlıq komitəsi və Ali Radanın sədri Ruslan Stefançukdur.

“Bu müraciətin əsas bəndi, əsas ideyası dünya ölkələrini, parlamentləri, dövlətləri Putini legitim kimi tanımamağa çağırmaqdır”, – Merejko aydınlıq gətirib.

Xatırladaq ki, prezident Vladimir Putinin 87 % səslə qalib elan olunduğu seçkilərdə üç opponenti var. Dövlət başçısı ilə yarışmağa Kommunist Partiyasından Nikolay Xaritonov, Rusiya Liberal-Demokratik Partiyasından Leonid Slutskiyə və Dövlət Dumasının sədr müavini Vladislav Davankova imkan verilib. Onlardan heç biri nə Rusiyanın Ukraynadakı müharibəsini, nə də birbaşa Putini tənqid edib.

Müstəqil namizədlər isə seçkilərə buraxılmayıb. Mərkəzi Seçki Komissiyası həm jurnalist Yekaterina Duntsova, həm də Vətəndaş Təşəbbüsü Partiyası tərəfindən namizədliyi irəli sürülmüş siyasətçi Boris Nadejdini qeydiyyata almaqdan imtina edib. Hər ikisi müharibəni tənqid edir və savaşın dayandırılmasının tərəfdarıdırlar.

Qalan namizədlər isə diqqəti özlərinə cəlb etməməyə çalışıblar. Səsvermənin yeganə intriqası onlardan hansının ikinci yeri tutacağı və hansı nəticə ilə olacağı olub.

Bundan başqa, 2024-cü ildə Rusiya prezidenti ilk dəfə Ukraynanın 4 vilayətinin – Zaporojyenin, eləcə də Xerson, Donetsk və Luqansk vilayətlərinin işğal olunmuş ərazilərində (ilhaq edilmiş Krımda prezident seçkiləri artıq 2018-ci ildə keçirilib) seçilib. Bu bölgələrdə sakinlər də seçicilərin yaşadıqları hərbi vəziyyət şəraitinə uyğunlaşdırılaraq seçkilərdə fəal iştirak etməyə məcbur ediliblər.

Son xəbərlər

Orphus sistemi