Türkiyəyə 11 ayda 43 milyon xarici turist səfər edib

Ötən ilin yanvarından noyabrına qədər Türkiyə xarici ölkələrdən səfər edən turistlərin sayı 42,91 milyon nəfər təşkil edib.

"Report" "Anadolu" agentliyinə istinadən xəbər verir ki, bu barədə ölkənin Mədəniyyət və Turizm Nazirliyinin xəbərində bildirilir.

Qeyd edilir ki, bu rəqəm keçən ilin analoji dövrü ilə müqayisədə 14,31% çox olub.

Nazirliyin məlumatına görə, Türkiyədə xarici turistlərin sayında rusiyalılar birinci yeri tutublar. Analoji dövrlə müqayisədə Türkiyəyə Rusiya Federasiyasından səfər edən səyahətçilərin sayı 2018-ci illə müqayisədə 17,42% (6,88 milyon nəfər) artıb.

Türkiyəyə gələn turistlərin sayında ikinci yeri Almaniya tutub - 4,83 milyon nəfər. Bu, 2018-ci ilin yanvar-noyabr ayları ilə müqayisədə 11,57% çoxdur. Siyahıda sonrakı yerdə Böyük Britaniya (2,5 milyon, 13,3% artım) qərarlaşıb.

Bolqarıstan və İran reytinq siyahısında dördüncü və beşinci yerləri bölüşürlər.

BMT-nin Ümumdünya Turizm Təşkilatının reytinqinə əsasən Türkiyə 2019-cu ildə də (2018-ci ildə olduğu kimi) turistlərin sayına görə dünyada altıncı ölkə olub.

Qeyd edək ki, Türkiyə turizm sahəsindən əldə etdiyi illik gəlirlə Avropada birinci yerdədir. Ölkə Avropada ən məşhur turizm istiqamətlərinin arasında altıncı yeri tutur.