Türkiyə Prezidenti: "Suriya və Əfqanıstandan əlavə köç yükünün öhdəsindən gələ bilməyəcəyik"

Türkiyə hərbi kontingenti Əfqanıstandan qayıdır.

"Report" "Anadolu"ya istinadən xəbər verir ki, bunu Türkiyə Prezidenti Rəcəb Tayyib Ərdoğan Bitlisin Ahlat rayonunda xarici ölkələrin Türkiyədəki səfirləri ilə görüşündə bildirib.

Onun sözlərinə görə, rəsmi Ankara "Taliban" liderlərinin bəyanatlarını "ehtiyatlı nikbinliklə" qəbul edir.

Ərdoğan Əfqanıstanda gedən proseslərin gələcəyini sözlə deyil, "Taliban" hərəkatının gələcək addımları ilə təyin edəcəyini vurğulayıb.

“Əfqanıstanda sabitliyin təmin edilməsi xüsusi əhəmiyyət kəsb edir. Bu məqsədə çatmaq üçün Ankara Əfqanıstanda bütün tərəflərlə sıx dialoqa davam edəcək", - Türkiyə Prezidenti deyib.

Ərdoğan, eyni zamanda 5 milyondan çox qaçqın və mühacirə qapılarını açan ölkə olaraq Türkiyənin Suriya və Əfqanıstandan əlavə köç yükünün öhdəsindən gələ bilməyəcəyini əlavə edib.