Türkiyə hərbçiləri Suriyanın İdlib əyalətinə daxil olmağa hazırdır

Bakı. 7 oktyabr. REPORT.AZ/ Türkiyə Silahlı Qüvvələrinin hərbçiləri və hərbi texnikası Suriyanın İdlib əyalətinə daxil olmaq üçün sərhədə yerləşdirilib.

“Report” Haberturk-ə istinadən xəbər verir ki, hərbçilər Qazaxıstanın paytaxtı Astana şəhərində üç təminatçı dövlətin - Türkiyə, İran və Rusiya arasında əldə edilən razılaşmaya uyğun olaraq, əyalətə yerləşdiriləcək.

Həmin ərazi 6-cı Astana görüşündə “münaqişəsiz” bölgə elan edilib.

Məlumata görə, 3 təminatçı dövlətin səlahiyyət verdiyi müşahidəçilər münaqişəsiz bölgələrə nəzarət edəcək. Onların əsas vəzifələri Bəşşar Əsəd rejimi ilə müxalif qüvvələr arasında atışmanın qarşısını almaqdır.

Türkiyə, İran və Rusiya hər biri bölgəyə 500 müşahidəçi göndərəcək. Türkiyə hərçiləri İdlibin içinin, Rusiya isə ətrafının təhlükəsizliyini təmin edəcək.

Məlumata görə, Azad Suriya Ordusu (ASO) İdlibə daxil olub. Bölgədə “Hayat Tahriri-Şam” adlı terror təşkilatı ilə ASO arasında atışma gedir. Bu terrorçu təşkilat “Əl-Qaidə”nin qolu sayılır.

Qeyd edək ki, İdlib Türkiyənin Hatay əyaləti ilə həmsərhəddir.