Varşava şəhərinin Mokotuv Rayon Məhkəməsi Polşanın hökumət təyyarəsi Tu-154M-in qəzaya uğradığı gün Smolensk-Severnı hava limanında növbətçilik edən üç rusiyalı aviadispetçerdən birinin müvəqqəti həbs edilməsi ilə bağlı Respublika Baş Prokurorluğunun vəsatətini təmin edib.
“Report” xəbər verir ki, bu barədə TASS-ın müxbirinə məhkəmənin Mətbuat Xidmətindən məlumat verilib.
“Viktora R.-yə (Polşa qanunlarına əsasən, soyad açıqlanmır - red.) qarşı iş üzrə məhkəmə şübhəli şəxs barəsində saxlanıldığı gündən 30 gün müddətinə həbs qətimkan tədbiri seçib”, - məlumatda bildirilib.
Qeyd edək ki, 2010-cu il aprelin 10-da Varşava-Smolensk marşrutu ilə uçan Polşa Hərbi Hava Qüvvələrinin prezident nümayəndə heyətinin Tu-154M təyyarəsi Smolensk-Severnı aerodromuna enərkən qəzaya uğrayıb. Təyyarədə olan 96 nəfərin hamısı həlak olub - 88 sərnişin və 8 ekipaj üzvü. Onların arasında Polşanın mərhum prezidenti Lex Kaçinski və xanımı Mariya Kaçinskaya, eləcə də tanınmış Polşa siyasətçiləri, demək olar ki, bütün yüksək hərbi komandanlıq, ictimai və din xadimləri olub.