Paşinyan: "Ermənistan KTMT-nin iclasında iştirakdan müxtəlif səbəblərdən imtina edib"

"Ermənistan KTMT-nin iclasında müxtəlif səbəblərdən iştirak etməkdən imtina edib".

“Report” xəbər verir ki, bunu Ermənistanın baş naziri Nikol Paşinyan parlamentin iclasında bildirib.

Onun sözlərinə görə, Ermənistan KTMT-dən çıxmaq üçün əsas hazırlamır, lakin bloka fikirləşmək üçün vaxt verir.

Paşinyan qeyd edib ki, KTMT mövcud öhdəliklərinə baxmayaraq, Ermənistanın təhlükəsizlik çağırışlarına lazımi cavab verməyib və bu, bir neçə dəfə təkrarlanıb:

“İctimaiyyətimiz üçün başa düşülən deyil ki, niyə hər dəfə gəlib, eyni şeyi təkrar edirik, heç bir cavab almadan gedib, qayıdırıq".

Bundan başqa, Baş nazir qeyd edib ki, nəqliyyat kommunikasiyaları da ölkənin təhlükəsizliyini gücləndirir. O əmindir ki, təhlükəsizliyi təkcə ordu deyil, həm də iqtisadi əlaqələr və nəqliyyat kommunikasiyaları təmin edir.

N.Paşinyanın sözlərinə görə, İrəvanın “Dünyanın kəsişməsi” proqramı Ermənistanın təhlükəsizliyini yaxşılaşdıracaq.

Qeyd edək ki, o, bir müddət əvvəl Belarusun paytaxtı Minskdə keçiriləcək KTMT-nin sammitinə qatılmaqdan imtina edib. Kremlin sözçüsü Dmitri Peskov N.Paşinyanın qərarından təəssüfləndiklərini bildirib.