Bakı. 11 may. REPORT.AZ/ Ermənistanın xarici işlər naziri vəzifəsinə ölkənin BMT-dəki daimi nümayəndəsi Zöhrab Mnatsakanyan təyin olunacaq.
"Report" xəbər verir ki, bu barədə "İnterfaks"a hökumətdəki mənbə məlumat verib.
52 yaşlı Z.Mnatsakanyan 1991-ci ildən Xarici İşlər Nazirliyində işləyir. O, 2002-2008-ci illərdə BMT-nin Cenevrə ofisində və digər beynəlxalq təşkilatlarda Ermənistanın daimi nümayəndəsi, Ermənistanın İsveçrədəki səfiri olub. 2008-2011-ci illərdə Ermənistanın Avropa Şurasında daimi nümayəndəsi vəzifəsini icra edib.
2011-ci ildən 2014-cü ilədək Ermənistanın xarici işlər nazirinin müavini vəzifəsində çalışan Z.Mnatsakanyan 2014-cü ildən Ermənistanın BMT-dəki daimi nümayəndəsidir.
Qeyd edək ki, Ermənistanın hazırkı xarici işlər naziri Edvard Nalbandyan bu vəzifəni 2008-ci ildən bəri icra edir.