Gürcüstanın müdafiə naziri NATO-nun baş katibi ilə görüşüb

Gürcüstanın müdafiə naziri Levan İzoria Brüsseldə NATO-nun baş katibi Yens Stoltenberqlə görüşüb.

“Report”un yerli bürosu xəbər verir ki, bu barədə Gürcüstanın Müdafiə Nazirliyi məlumat yayıb.

Görüşdə NATO-Gürcüstan əməkdaşlığı və gələcək planlar müzakirə olunub.

L.İzoria bildirib ki, görüşdə əsas mövzulardan biri NATO-nun Qara dəniz bölgəsinin təhlükəsizliyinin gücləndirilməsindəki rolu olub.

Tərəflər həmçinin Gürcüstanın müdafiə sahəsində həyata keçirilən islahatlar və NATO-Gürcüstan əməkdaşlıq planının yerinə yetirilməsi istiqamətində əldə olunan nailiyyətləri də nəzərdən keçiriblər.

Müdafiə naziri həmçinin NATO baş katibinin müavini Roza Qotemüllerlə də görüş keçirib.

L.İzoria NATO-ya üzv və tərəfdaş ölkələrin müdafiə nazirlərinin görüşündə iştirak edir.