Fəhlələr Ermənistan-Gürcüstan dəmir yolunu bağlayıblar

Bakı. 13 fevral. REPORT.AZ/ Ermənistanın Alaverdi rayonundakı misəritmə zavodunun əməkdaşları bu gün Ermənistan-Gürcüstan dəmiryolunu bağlayıblar.

“Report” xəbər verir ki, məlumatı “Sputnik Armeniya” yayıb.

Bildirilib ki, aksiya iştirakçıları zavodun gələcək fəaliyyətinə aydınlıq gətirilməsini tələb ediblər.

Onlar Baş nazir Nikol Paşinyan (yaxud bu sahəyə məsul olan Baş nazirin müavini) və "Valleks” şirkətinin rəhbəri Valeri Meclumyanın, həmçinin zavodun keçmiş sahibi, VTB-nin (Ümumrusiya Ticarət Bankı) Yerevandakı filialının nümayəndəsinin iştirakı ilə üçtərəfli danışıqların keçirilməsini tələb ediblər.

Məlumata görə, Alaverdi misəritmə zavodu 2018-ci il oktyabrın 19-da fəaliyətini dayandırıb.

“Valleks” və VTB hadisəyə münasibət bildirməyib.