Ərdəbildə yerli sakinlərin yerinə gəlmələr işə götürülür

İranın Ərdəbil əyalətinin şəhər və rayonlarında yerli fəhlələr müxtəlif bəhanələrlə işdən çıxarılır və onların yerinə miqrantlar götürülür.

“Report” “Tərbiz-Turan”a istinadən xəbər verir ki, bu barədə İranın Milli Statistika İdarəsi məlumat yayıb.

Bildirilib ki, ölkə üzrə işsizlik 11 faiz olduğu halda, Ərdəbildə bu göstərici 12,8 faizdir.

Kooperativ İnkişaf Bankının Ərdəbil əyalətindəki filiallarının meneceri Adil Kərimi deyib ki, 2022-ci ilin yazında əyalət üzrə işsizlik səviyyəsi 14 faiz təşkil edib. İran üzrə orta göstərici 9,8 faiz olub.

Vurğulanıb ki, Ərdəbil əyalətində əhalinin artım tempi də başqa bölgələrlə müqayisədə əhəmiyyətli dərəcədə azdır.

Qeyd edək ki, Ərdəbil əyalətində əhali əsasən Azərbaycan türklərindən ibarətdir. Bölgədə gəlmələrin işlə təmin olunmasına üstünlük verilməsi süni şəkildə başqa etnik qrupların sayının artması ilə nəticələnə bilər.