ABŞ İran nefti ilə bağlı sanksiyalarda heç kimə güzəşt etməyəcək

ABŞ hökuməti neftlə bağlı İrana qarşı sanksiyalarda bundan sonra heç kimə möhlət verməyəcək.

“Report” TASS-a istinadən xəbər verir ki, bu barədə ABŞ Dövlət Departamentinin İran üzrə xüsusi nümayəndəsi Brayan Huk keçirdiyi brifinqdə deyib.

“Artıq neftlə bağlı sanksiyalarda istisnalar olmayacaq. Yalnız razılaşdığımız dövrdə, yəni 2018-ci ilin noyabr ayından 2019-cu ilin may ayınadək həyata keçirilən neft idxalı əməliyyatları icazəli sayılır və həmin müddət başa çatandan sonra İran neftini tədarük etmək üçün hər hansı bir cəhd göstərildikdə sanksiya tətbiq edəcəyik”, - deyə Ağ Ev rəsmisi Çin və Hindistan kimi ölkələrin mayın 1-dən sonra da, heç olmasa, kiçik həcmdə İran neftini idxal edib-etməyəcəyi barədə suala cavab verərkən vurğulayıb.

Xatırladaq ki, aprelin 22-də ABŞ prezidenti Donald Tramp İranın neft ixracına qarşı 2018-ci ilin noyabr ayından bərpa etdikləri sanksiyalarla bağlı möhlətləri uzatmamaq qərarı vermişdi. Həmin vaxt sanksiyaları bərpa etməklə yanaşı, Ağ Ev İran neftinin bəzi iri idxalatçı ölkələrinə 6 ay müddətində idxala davam etmək icazəsi vermişdi.