Yuxarı

Yığma komandanın baş məşqçisi: "Güləşçilərimiz Rio-2016-da yeni tarix yazacaqlar"

Çalışacağıq ki, nəticəmiz yüksək olsun

Bakı. 28 may. REPORT.AZ/ "İdmançılar həvəslə və var gücləri ilə məşq edirlər. Olimpiya Oyunlarında iştirak edəcək idmançılarımızın hamısının medal qazanmaq şansı böyükdür".

"Report"un məlumatına görə, bunu yunan-Roma güləşi üzrə Azərbaycan yığma komandasının baş məşqçisi Cəmşid Xeyrəbadi jurnalistlərə açıqlamasında deyib.

Göygöl Olimpiya İdman Kompleksində baş tutan təlim-məşq toplanışını dəyərləndirən mütəxəssis komandanın məşqlərinin yüksək səviyyədə təşkil edildiyini və idmançıların 2016-cı il Rio-de-Janeyro Yay Olimpiya Oyunlarında yüksək nəticə göstərəcəklərinə inandığını bildirib: "Federasiya toplanış üçün hər bir şərait yaradıb və hazırlıq normal keçib. İnanıram ki, güləşçilərimiz Rio-2016-da yeni tarix yazacaqlar".

Sərbəst güləş yığmasının baş məşqçisi Saypulla Absaidov Kuba güləşçiləri ilə birgə təlimlərin keçirilməsinin yığmamız üçün çox faydalı olduğunu söyləyib: "Olimpiya Oyunlarına 2 aydan bir qədər artıq vaxt qalır. İndi biz intensiv hazırlıq mərhələsindəyik. İyun ayında yoxlama xarakterli beynəlxalq turnirdə idmançılarımızı sınayacağıq. Bundan sonra artıq olimpiadanın əsas hazırlıq mərhələsinə qədəm qoyacağıq. Ötən olimpiadada 2 qızıl medal qazanmışdıq. Bu, hər bir komandanın arzusunda olduğu nəticədir. Heyətimizdə kifayət qədər titullu idmançılar var. Bu dəfə də çalışacağıq ki, nəticəmiz yüksək olsun".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi