Yuxarı

Gənclər və idman naziri: "Vəkil vasitəsilə işlərə başlamışıq"

Azad Rəhimov ağırlıqqaldıranların lisenziyalarının alınmasına münasibət bildirib

Bakı. 23 iyun. REPORT.AZ/ Beynəlxalq Ağırlıqqaldırma Federasiyasının (IWF) Azərbaycan ağırlıqqaldıranlarına tətbiq etdiyi cəzadan apellyasiya veriləcək. "Report"un məlumatına görə, bu barədə gənclər və idman naziri Azad Rəhimov jurnalistlərə açıqlamasında bildirib. 

2016-cı il Yay Olimpiya Oyunlarına 4 lisenziya qazanılsa da, IWF Azərbaycanın 1 kişi, 1 qadın ağırlıqqaldıranını vəsiqədən məhrum edib. Nazir idmançılardan bəzilərinin cəzaları ilə razı olmadıqlarını və şikayət edəcəklərini söyləyib. A.Rəhimov hazırda son qərarla bağlı məktub gözlədiklərini deyib: "Biz vəkil vasitəsilə işə başlamışıq. Hazırda Beynəlxalq Olimpiya Komitəsindən son qərarla bağlı məktub gözləyirik. Çox istərdik ki, yüksək nəticə göstərmiş ağırlıqqaldıranlarımız olimpiadada iştirak etsinlər". 

Qeyd edək ki, Beynəlxalq Ağırlıqqaldırma Federasiyası İcraiyyə Komitəsinin Gürcüstanın paytaxtı Tbilisidəki iclasında qəbul olunan qərara əsasən, 2016-cı il Rio-de-Janeyro Yay Olimpiya Oyunlarına hazırlıq dövründə dopinq-testlərin dəfələrlə müsbət nəticə verməsi səbəbindən, Azərbaycanın əlindən 2 lisenziyası (1 kişi, 1 qadın atlet) geri alınıb. Nəticədə ölkəmiz "Rio-2016"da cəmi 3 kişi atletlə təmsil olunacaq. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi