“Ana harayı”nın 29-cu ili - FOTOREPORTAJ 

Azərbaycan xalqı Xocalı soyqırımı qurbanlarının xatirəsini anmaq üçün Bakıda ucaldılmış “Ana harayı” abidəsini ziyarət edir.

“Report”un xəbərinə görə, ziyalılar, ictimaiyyət nümayəndələri, habelə sıravi vətəndaşlar abidənin önünə gül dəstələri düzür, faciə qurbanlarının ruhuna dualar oxuyurlar.

Dünyada və ölkədə geniş yayılan koronavirus infeksiyasına yoluxma riski nəzərə alınaraq bu il ziyarət əvvəlki illərdən fərqli təşkil edilir. Belə ki, tətbiq olunan qaydalara uyğun olaraq vətəndaşlar “Ana harayı” abidəsini tibbi maskadan istifadə edərək və sosial məsafəni qoruyaraq beş nəfərlik qruplar şəkilində ziyarət edirlər.

Beləliklə, infeksiyaya yoluxma riskinə görə abidənin ətrafında insanların toplaşmasına icazə verilmir. Vətəndaşlar ziyarətlərini başa vurub ərazidən çıxırlar.

Qeyd edək ki, bu gün səhər saatlarında Azərbaycan Respublikasının Prezidenti İlham Əliyev və birinci xanım Mehriban Əliyeva Xocalı soyqırımının 29-cu ildönümü münasibətilə Bakıda faciə qurbanlarının xatirəsinə ucaldılmış “Ana harayı” abidəsini ziyarət edib. Prezident İlham Əliyev Xocalı soyqırımı abidəsinin önünə əklil qoyub, faciə qurbanlarının xatirəsini ehtiramla yad edib. Birinci xanım Mehriban Əliyeva abidənin önünə gül dəstəsi qoyub.

Xatırladaq ki, 1992-ci il fevralın 25-dən 26-na keçən gecə erməni hərbi birləşmələri Rusiyanın 366-cı motoatıcı alayının köməyi ilə Xocalı şəhərinə hücum edib. Şəhərin 2500 sakini xilas olmaq üçün Ağdam istiqamətində hərəkət edib. Ermənilər isə dinc sakinləri gülləbaran ediblər.

Erməni təcavüzkarlarının Azərbaycan xalqına qarşı törətdiyi növbəti kütləvi qırğın 613 nəfərin, o cümlədən 106 qadın, 63 uşaq, 70 qocanın həyatına son qoyub. 1275 dinc sakin əsir götürülüb, onlardan 150 nəfərinin taleyi hələ də məlum deyil. 475 nəfər şikəst olub. 8 ailə bütünlüklə məhv edilib. 25 uşaq hər iki valideynini, 130 uşaq isə valideynlərindən birini itirib.