Yuxarı

Kabel şəbəkəsi yayımı ilə bağlı bəzi qadağaları nəzərdə tutan qanun layihəsi yenidən müzakirəyə çıxarılır

Bakı. 17 yanvar. REPORT.AZ/ Azərbaycanda kabel şəbəkəsi yayımı ilə bağlı bəzi qadağaları nəzərdə tutan “Kabel şəbəkəsi yayımı haqqında” qanun layihəsi (ikinci oxunuş) Milli Məclisin yaz sessiyasında müzakirəyə çıxarılacaq.

“Report” xəbər verir ki, bu barədə Milli Məclisin Mədəniyyət komitəsinin bu gün keçirilən iclasında komitə sədri Rafael Hüseynov məlumat verib.

O bildirib ki, layihəyə edilən təkliflər, iradlar nəzərə alınıb: “Biz üzərimizə düşən öhdəliyi yerinə yetirmişik”.

Xatırladaq ki, qanun layihəsi 17 maddədən ibarətdir. Qanun kabel televiziyası şəbəkəsi yayımının hüquqi, iqtisadi və təşkilati əsaslarını müəyyən edir.

Layihəyə əsasən, Azərbaycanda kabel şəbəkəsi yayımında retranslyasiya olunan telekanallarda xarici reklamların yayımı qadağan edilir. Buna görə yayımçı məsuliyyət daşıyacaq.

Kabel şəbəkəsi yayımında retranslyasiya olunan xarici telekanallarda reklam vaxtlarında yayım qaydaları müvafiq icra hakimiyyəti orqanının yaratdığı qurum tərəfindən müəyyən olunur.

Kabel şəbəkəsi yayımçısı dövlət maraqqlarının qorunması məqsədilə kabel şəbəkəsi üzrə yayımlanması nəzərdə tutulan proqram paketini müvafiq icra hakimiyyəti orqanının yaratdığı qurumla razılaşdırır.

Xarici ölkələrin teleradio yayımçısı Azərbaycanda fəaliyyət göstərən yayımçının proqram paketində yayımlanmaq üçün müvafiq icra hakimiyyəti orqanının yaratdığı qurumdan icazə almalıdır. Müvafiq icra hakimiyyəti orqanının yaratdığı qurum tərəfindən icazə verilməyən hər hansı xarici telekanalın yayımına görə yayımçı məsuliyyət daşıyır.

Kabel şəbəkəsi ilə yayımlanan mövcud teleradio proqramlarının məzmununa yayımçı nəzarət edir. Teleradio proqramlarının tərkibində dövlətin qanuni maraqlarına toxunan, etnik, irqi və dini ayrı-seçilik təbliğ edən verilişlərə görə proqramın sahibi məsuliyyət daşıyır. Yayımçıbelə proqramların kabel şəbəkəsi ilə yayımını məhdudlaşdıra, dayandıra və ya yayım təşkilatı ilə bağladığı müqaviləni ləğv edə bilər.

Bundan başqa, layihədə qeyd olunub ki, Azərbaycanda kabel şəbəkəsi yayımçısı dövlət ehtiyacları məqsədi ilə icra hakimiyyəti orqanının yaratdığı qurum tərəfindən teleradio yayımı üçün lisenziya verilmiş yayımçıların proqramlarını ödənişsiz yayımlamağa borcludur.

Müvafiq icra hakimiyyəti orqanının yaratdığı qurumun razılığı olmadan abonentin yaşayış və qeyri-yaşayış sahələrində kabel şəbəkəsinə teleradio proqramlarında monitorinq məqsədilə hər hansı müdaxilə qadağandır.

Qanun layihəsi parlamentin 2017-ci il yaz sessiyasında birinci oxunuşda qəbul edilib. Müzakirələr zamanı deputatlar layihənin bəzi detallarının dəqiqləşdirilməsinin vacibliyini vurğulayıblar. Ona görə qanun layihəsinin ikinci və üçüncü oxunuşda qəbulu ləngiyib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi