Deputat Elman Məmmədov Milli Məclisdə hökumət üzvlərini tənqid edib

Bakı. 14 noyabr. REPORT.AZ/ Milli Məclisin bu gün keçirilən plenar iclasında 2019-cu ilin dövlət büdcəsi layihəsinin müzakirəsi zamanı deputat Elman Məmmədov hökumət üzvlərini tənqid edib.

“Report”un xəbərinə görə, E.Məmmədov qeyd edib ki, Milli Məclisdə dövlət büdcəsi müzakirə edilir, təkliflər irəli sürülür, problemlər qaldırılır.

“Biz qaldırdığımız məsələləri hökumət üzvlərinin diqqətinə çatdırmağa çalışırıq, amma onların bir çoxu iclası tərk edib. Biz özümüz üçün danışırıq?”, - deyə deputat bildirib.

Milli Məclisin sədri Oqtay Əsədov isə ona cavab olaraq deyib ki, hökumət üzvləri iki gündür iclasda iştirak edirlər: “Bəzi sahələrin aidiyyəti şəxsləri gediblər. Amma müzakirəyə aidiyyəti olan şəxslərin hamısı iclasda iştirak edirlər”.