Yuxarı
    Bağlamaq

    YAP pulsuz efir vaxtından imtina ilə bağlı MSK-ya müraciət edib

    Hakim partiya pulsuz təşviqatdan imtina haqda qərar qəbul edib

    Bakı. 9 oktyabr. REPORT.AZ/ Hakim Yeni Azərbaycan Partiyası (YAP) noyabrın 1-də keçiriləcək parlament seçkilərinin təşviqat mərhələsində pulsuz efir vaxtından istifadə etməyəcək. 

    Bunu "Report"a açıqlamasında YAP icra katibinin müavini, deputat Siyavuş Novruzov deyib.

    O bildirib ki, partiya pulsuz təşviqatdan imtina haqda qərar qəbul edib. S.Novruzovun sözlərinə görə, artıq bununla bağlı müraciəti Mərkəzi Seçki Komissiyasına göndəriblər. 

    O xatırladıb ki, bu il keçiriləcək parlament seçkilərində YAP-ın 60-dan artıq seçki dairəsində namizədi qeydə alınıb: "Amma digər partiyalar, seçki bloku 60-dan artıq seçki dairəsində namizəd qeydiyyatdan keçirə bilməyiblər. Seçki Məcəlləsində nəzərdə tutulduğu kimi 60-dan çox dairədə namizədimiz qeydə alındığına görə, YAP-a pulsuz efir vaxtı ayrılır, dövri mətbuatda təşviqatın aparılmasına şərait yaradılır. Amma YAP bundan istifadə etməyəcək. Çünki başqa partiyaların və parlament seçkisinə qatılan blokun deputatlığa namizədlərinin sayı azdır və 60-dan artıq dairədən namizədləri olmadığına görə pulsuz təşviqat aparmaq hüququ qazana bilməyiblər. Belə olanda da alternativlik olmur. Ona görə də dövlətin ayırdığı ödənişsiz efir vaxtından imtina etmişik".

    Qeyd edək ki, Seçki Məcəlləsinə əsasən, 60-dan çox seçki dairəsindən namizədləri qeydə alınan siyasi partiyalara, siyasi partiyaların bloklarına seçkiqabağı təşviqat aparmaq üçün İctimai Televiziya və Radioda efir vaxtı ayrılır, o cümlədən dövlətdən maliyyələşən dövri mətbuatda pulsuz təbliğat-təşviqat aparmaq üçün şərait yaradılır.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi