Bakı. 21 oktyabr. REPORT.AZ/ ATƏT-in Demokratik Təsisatlar və İnsan Haqları Bürosu (DTİHB) Azərbaycana müşahidəçi göndərməkdən imtina etməklə bir sıra ölkələrlə münasibətləri pisləşdirə bilər.
"Report" "RİA Novosti"yə istinadən xəbər verir ki, bu barədə Rusiya Mərkəzi Seçki Komissiyasının sədri Vladimir Çurov regionların seçki komissiyalarının sədrləri ilə keçirilən ümumrusiya müşavirəsində bildirib.
"Düşünürəm ki, bu insident bir sıra ölkələrin Demokratik Təsisatlar və İnsan Haqları Bürosu ilə münasibətlərinə ciddi təsir edəcək", - o deyib.
Xatırladaq ki, sentyabrın 11-də ATƏT-in Demokratik Təsisatlar və İnsan Haqları Bürosunun (DTİHB) direktoru Maykl Link bildirib ki, qurum Azərbaycandakı parlament seçkilərinə müşahidəçi missiyası göndərməmək haqda qərar qəbul edib.
ATƏT-in Azərbaycandakı daimi nümayəndəliyi bu qərardan narahatlığını bildirib: "Bu, ATƏT DTİHB direktorunun üzərinə qoyulan mandatın ciddi şəkildə pozulmasıdır".
Azərbaycanda növbəti parlament seçkiləri noyabrın 1-də keçiriləcək.