​Mətbuat Şurasının “qaynar xətt” rejimində fəaliyyət göstərən telefon nömrələrinə müraciət daxil olmayıb

Bakı. 23 dekabr. REPORT.AZ/ Azərbaycan Mətbuat Şurası (MŞ) bələdiyyə seçkisində jurnalistlərin prosesi işıqlandırmalarının monitorinqini aparmaqdadır. Şuradan “Report”a bildirilib ki, bu məqsədlə MŞ sədri Əflatun Amaşov Nəsimi, qurumun sədr müavini Umud Rəhimoğlu Binəqədi, Şuranın İdarə Heyətinin üzvlərindən – “İki sahil” qəzetinin baş redaktoru Vüqar Rəhimzadə Xətai rayonunun seçki məntəqələrində jurnalistlərə yaradılmış şəraitlə, eləcə də onların prosesi işıqlandırmalarının vəziyyətilə tanış olublar. Hansısa neqativ cəhət qeydə alınmayıb.

Mətbuat Şurasının “qaynar xətt” rejimində fəaliyyət göstərən (012) 441 35 96 telefon, (055) 201 99 26 və (050) 534 93 26 mobil nömrələri də saat 08.00-dan başlayaraq jurnalistlərin ixtiyarındadır. Saat 14-dək səsvermə prosesini işıqlandıran kütləvi informasiya vasitələrinin təmsilçilərindən MŞ-nin telefon nömrələrinə hər hansı zəng olunmayıb.

Qeyd edək ki, “qaynar xətt” rejimində fəaliyyət göstərən telefon nömrələrinə daxil olan müraciətlərin araşdırılması üçün Mətbuat Şurası Mərkəzi Seçki Komissiyası və digər əlaqədar qurumlarla daimi əlaqədə olacaq və peşə vəzifəsini yerinə yetirən jurnalistlərin tam sərbəst şəkildə fəaliyyət göstərmələri üçün bütün tədbirlər görüləcək.