Beynəlxalq Muğam Mərkəzində Azərbaycan və İsrail musiqiçilərinin iştirakı ilə konsert keçirilib - FOTO

Bakı. 4 dekabr. REPORT.AZ/ Beynəlxalq Muğam Mərkəzində Azərbaycan və İsrail musiqiçilərinin iştirakı ilə "Sound Wave" etnokonserti keçirilib.

"Report" xəbər verir ki, konsertdən əvvəl çıxış edən İsrailin Azərbaycandakı səfiri Dan Stav Bakıya gəlmiş muqisiçilər Qadi Ben Elişu və Şem Tova Levi haqda danışaraq onların İsrailin ən məşhur musiqiçilərindən olduqlarını deyib

Səfir həmçinin konserti əhəmiyyətli mədəni hadisə adlandırıb və onun uzun müddət tamaşaçıların yaddaşında qalacağına ümid etdiyini bildirib.

Daha sonra konsertin təşkilatçılarından olan Paolo Kasaqrande tamaşaçıları salamlayaraq onların proqramdan zövq alacaqlarına ümidini ifadə edib.

İsrail musiqiçiləri azərbaycanlı həmkarları Hüseyn Məlikovla, Sahib Paşazadə ilə, Toğrul Asadullayevlə və Soltan Əliyevlə birlikdə iki ölkənin milli musiqi nümunələrini tamaşaçılara təqdim ediblər.

Qeyd edək ki, konserti 350-dən çox tamaşaçı izləyib.