Yuxarı

Düsseldorfda Müslim Maqomayevin anadan olmasının 75-ci ildönümü qeyd olunub

Düsseldorfda Müslim Maqomayevin anadan olmasının 75-ci ildönümü qeyd olunub
Tədbirdə Müslim Maqomayevin repertuarından mahnılar səsləndirilib

Bakı. 25 sentyabr. REPORT.AZ/ Sentyabrın 23-də Almaniyanın Düsseldorf şəhərinin Robert Şuman Konsert Zalında Müslim Maqomayevin anadan olmasının 75-ci ildönümünə həsr olunmuş mədəniyyət gecəsi keçirilib. 

Azərbaycanın Almaniyadakı səfirliyindən "Report"a verilən məlumata görə, tədbirdə Nordrayn Vestfaliya əyalətinin parlamentinin deputatları Filip Taser və İonis Vatalis, Düsseldof Əcnəbilər Şurasının sədri Katarina Kabata, Müslim Maqomayev Fondunun baş direktoru Marqarita Kosareva, Azərbaycan Almaniyadakı səfirliyinin müşaviri Marat Kəngərlinski, Rusiyanın Düsseldorfdakı baş konsulunun müavini Valeriy Sidorov qonaq qismində iştirak ediblər. 

Gecədə çıxış edən qonaqlar Müslim Maqomayevin həyatı və yaradıcılığı haqqında söhbət açıb, ürək sözlərini bölüşüblər.

Konsertdə “Xəzər virtuozları” kamera orkestrinin müşayiəti ilə opera solistləri İlham Nəzərov, Dəmir və Tatyana Zakirovların ifalarında dünya korifeylərinin əsərlərindən və Müslim Maqomayevin repertuarından mahnılar səslənib. Çexiyada yaşayan şair Lalə Cəfərova isə Müslim Maqomayevin xatirəsinə həsr etdiyi şeiri oxuyub. 

Konsertin sonunda Müslim Maqomayev Fondunun prezidenti, mərhum müğənninin həyat yoldaşı Tamara Sinyavskaya çıxış edərək təşkilatçılara, ifaçılara və qonaqlara öz təşəkkürünü və dərin minnətdarlığını bildirib. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi