Tbilisi. 2 aprel. REPORT.AZ/ Tbilisidə tanınmış rəqqas və baletmeystr Vaxtanq Çabukiani adına IV beynəlxalq xoreoqrafiya festivalı başa çatıb.
“Report”un Gürcüstan bürosu xəbər verir ki, ölkəmizi festivalda təmsil edən Azərbaycan Respublikası Uşaq Yaradıcılıq Mərkəzinin “Təbəssüm” rəqs qrupunun çıxışı diploma layiq görülüb.
Aprelin 2-də beynəlxalq münsiflər heyəti diplomları qrupa təqdim edib.
Qeyd edək ki, festivalda Gürcüstan, eləcə də, Azərbaycan, Türkiyə, Ermənistan və Rusiyadan gəlmiş 9-13, 14-18 və 19-25 yaş qruplarında rəqqaslar mübarizə aparıblar.
“Təbəssüm” qrupu “Bayram” və “Basqalı” rəqslərini ifa edib. Qrupun üzvləri İ.Cavaxişvili adına Tbilisi Dövlət Universitetinin nəzdindəki Azərbaycanın Dostları Klubunda da olublar.
Klubun rəhbəri Leyla Əmrahova burada görülən işlər, Azərbaycanın təbliği və s. məsələlər barədə kollektivə məlumat verib.