Tbilisi. 2 noyabr. REPORT.AZ/ Tbilisinin Axmeteli Dövlət Dram Teatrında Gəncə Dövlət Dram Teatrının baş rejissoru İradə Gözəlovanın səhnəyə qoyduğu “Hellados” tamaşasının premyerası keçirilib.
“Report”un Gürcüstan bürosunun verdiyi xəbərə görə, tamaşa tanınmış gürcü yazıçı Nodar Dumbadzenin eyniadlı əsəri əsasında səhnələşdirilib.
Əsərin əsas mövzusu yunan əsilli Yanquli adlı gəncin boya-başa çatdığı Suxum şəhərindən atası ilə birgə Yunanıstana qayıtmasına həsr olunub. Gənc doğma Suxumdan, yaxın dostları və sevdiyi qızdan ayrılmağa özündə güc tapmır. Tamaşa Yanqulinin atası ilə birgə gəmi ilə Yunanıstana yola çıxarkən özünü dənizə ataraq ölməsi ilə başa çatır.
Səhnə əsərində əsas rolları Giorgi Tsxadadze, Andria Qvelesiani, Demo Kalandadze, Nino Tsimakuridze və digər aktyorlar canlandırıb.
İ.Gözəlova premyeradan sonra tamaşada rol almış aktyorların oyunundan razı qaldığını bildirib: “Tamaşanın izləyicilər tərəfindən rəğbətlə qarşılanması mənim üçün xoş oldu. Ümid edirəm ki, bu tamaşa teatrsevərlərin ürəyində uzun müddət xüsusi yer tutacaq”.
Tamaşanın əsas qəhrəmanı Yanquli obrazını yaratmış aktyor Andria Qvelesiani “Report”a açıqlamasında İ.Gözəlova ilə iş birliyinin uğurlu alındığını bildirib: “Bu tamaşa İradə xanımla ilk işim oldu. Onunla tamaşa üzərində çalışmaq xoş və gözəl oldu”.
Səhnə əsərinin digər qəhrəmanı Elena obrazını canlandırmış aktrisa Nino Tsimakuridze də azərbaycanlı rejissorla çalışmağın çox maraqlı olduğunu deyib: “İradə xanım istedadlı rejissordur və onunla iş birliyimiz çox xoş oldu”.
Premyeranın tamaşaçıları arasında Gəncə Dövlət Dram Teatrının rəhbərliyi, Tbilisi Dövlət Azərbaycan Dram Teatrının aktyorları da olub. “Hellados” tamaşaçılar tərəfindən böyük maraq və rəğbətlə qarşılanıb.