Moskvada “Azərbaycan” pavilyonunda Müstəqillik Günü qeyd olunacaq

Mayın 28-də Rusiya paytaxtı Moskvadakı Xalq Təsərrüfatı Nailiyyətləri Sərgisinin (VDNX) “Azərbaycan” pavilyonunda  Müstəqillik Günü münasibətilə təntənəli tədbirlər keçiriləcək.

“Report”un Rusiya bürosunun verdiyi məlumata görə, konsert proqramını Ümumrusiya və Beynəlxalq müsabiqələrin laureatları, nüfuzlu musiqi festivallarının baş mükafatlarının laureatları - İbrahim Nağıyev (violonçel) və Dmitri Tsıqanov (fortepiano) Qara Qarayev, Ələkbər Tağıyev və başqa Azərbaycan bəstəkarlarının əsərləri ilə açacaqlar.

Tədbir çərçivəsində açıq havada əfsanəvi Pavilyonun fasadında “open air” konserti keçiriləcək. Sərginin qonaqları Azərbaycan baletindən, eləcə də SSRİ Xalq artisti Vyaçeslav Qordeyevin rəhbərlik etdiyi “Rus baleti” Moskva Vilayət Dövlət Akademik Teatrının solistlərinin inanılmaz məharətindən zövq ala biləcəklər.

Möhtəşəm binanın fonunda Qara Qarayevin “Yeddi gözəl”, Fikrət Əmirovun “Min bir gecə” baletlərindən, həmçinin görkəmli Azərbaycan baletmeysterləri Rəfiqə Axundova və Maqsud Məmmədovun xoreoqrafiyasında Nazim Əliverdibəyovun musiqisinə “Muğam” xoreoqrafik miniatüründən səhnələr nümayiş olunacaq.