Yuxarı
    Bağlamaq

    İçərişəhər Ənənəvi İncəsənət Mərkəzinin 3 illik fəaliyyətinin yekunlarına həsr olunan sərginin açılışı olub

    Rəssamlıq Akademiyasının tələbələri burada təcrübə keçəcəklər

    Bakı. 3 oktyabr. REPORT.AZ/ Bu gün İçərişəhər Ənənəvi İncəsənət Mərkəzinin 3 illik fəaliyyətinin yekunlarına həsr olunan sərginin açılışı olub. Təhsil Nazirliyindən "Report"a verilən məlumata görə, mərasim iştirakçıları əvvəlcə sərgi ilə tanış olublar.

    Sərgidə batika, keramika, zərgərlik və taxta üzərində oyma sənəti nümunələri nümayiş etdirilir. Hazır məhsullar və yaradıcılıq prosesini təsvir edən posterlərlə tanışlıqdan sonra qonaqlara Mərkəzin yaradılması və fəaliyyətini əks etdirən film nümayiş olunub.

    Tədbirin rəsmi açılış mərasimində təhsil naziri Mikayıl Cabbarov, "İçərişəhər" İdarəsinin rəisi Samir Nuriyev, Ənənəvi İncəsənət üzrə Şahzadə Məktəbinin direktoru Xalid Azzam və Rəssamlıq Akademiyasının rektoru Ömər Eldarov çıxış edərək Mərkəzin ötən müddət ərzindəki fəaliyyətindən, milli tətbiqi-dekorativ incəsənət sahələrinin inkişafına verdiyi töhfədən danışıblar.

    Natiqlər layihənin gerçəkləşdirilməsində Heydər Əliyev Fondunun və onun Prezidenti, ölkənin birinci xanımı Mehriban Əliyevanın əvəzsiz rolunu vurğulayaraq, daimi olaraq göstərilən dəstəyə görə ona xüsusi minnətdarlıqlarını bildiriblər.

    Qeyd olunub ki, Təhsil Nazirliyinin və Rəssamlıq Akademiyasının birgə layihəsi çərçivəsində Mərkəzdə bu təhsil müəssisəsinin tələbələri təcrübə keçəcəklər.

    Daha sonra İçərişəhər Ənənəvi İncəsənət Mərkəzinin ilk məzunlarına diplomlar təqdim edilib. Sonda tədbir iştirakçıları Mərkəzin emalatxanası ilə tanış olublar.

    Azərbaycanın zəngin ənənəvi incəsənət irsinin öyrənilməsinə və canlandırılmasına xidmət edən bu Mərkəz "İçərişəhər" Dövlət Tarix-Memarlıq Qoruğu İdarəsinin fəaliyyətində rəhbər tutduğu "CANLI TARİX" konsepsiyası çərçivəsində yaradılıb. Layihənin əsas məqsədi həm də Azərbaycanın zəngin milli-mədəni irsinə uyğun ənənəvi naxışların müasir üsullarla işlənərək yeni dizaynlı məhsulların istehsalına və bu məhsulların beynəlxalq səviyyədə təbliğinə nail olmaqdan ibarətdir.

    İçərişəhər Ənənəvi İncəsənət Mərkəzinin tələbələrinin hazırladıqları əl işləri ölkədə və xaricdə keçirilən sərgilərdə xalqımızın zəngin incəsənət irsini uğurla təbliğ edir. Eyni zamanda, Təhsil Nazirliyi ilə əməkdaşlıq çərçivəsində şagirdlər üçün Mərkəzin nəzdində Gənc Rəssamlar Klubu yaradılıb. Burada Mərkəzin tələbələri öz bilik və bacarıqlarını uşaqlarla bölüşürlər.

    Xatırladaq ki, "İçərişəhər"in və Şahzadə Məktəbinin birgə layihəsi olan "İçərişəhər Ənənəvi İncəsənət Mərkəzi" Heydər Əliyev Fondunun təşəbbüsü və dəstəyi ilə 2012-ci ilin oktyabr ayından etibarən tədris və sənətkarlıq mərkəzi kimi fəaliyyət göstərir.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi