Yuxarı

BMT qərargahında "Son dünya müharibəsi: sülh naminə xatırlamaq" adlı fotosərgi açılıb

Sərginin təşkilatçıları kimi Rusiya, Azərbaycan, Ermənistan, Belarus, Qazaxıstan, Qırğız Respublikası, Tacikistan və Türkmənistan çıxış edib

Bakı. 5 may. REPORT.AZ/  Nyu-Yorkda BMT qərargahında "Son dünya müharibəsi: sülh naminə xatırlamaq" adlı fotosərgi açılıb. "Report" "TASS"a istinadən xəbər verir ki, təşkilatçılarının Rusiya, Azərbaycan, Ermənistan, Belarus, Qazaxıstan, Qırğız Respublikası, Tacikistan və Türkmənistan olduğu ekspozisiya 40 fotoşəkildən ibarətdir və şərti olaraq 2 hissəyə bölünüb. 

BMT Baş Assambleyasının foyesində sərgilənən şəkillər arasında "Reyxstaq üzərində Qələbə bayrağı", 1945-ci ildə Moskvada keçirilən Qələbə Paradaı və Elba çayında Rusiya və ABŞ qoşunlarının məşhur görüşü əks olunan fotolar var. Həmçinin yaralı əsgərə qulluq edən tibb bacısı, Stalinqrad döyüşündə pulemyot atəşi, "Bakıdan - cəbhəyə!" Azərbaycan neftinin daşınması əks olunan fotolar da burada nümayiş olunub. 

Sərginin ikinci hissəsində keçmiş Sovet İttifaqı respublikalarından olan 15 qəhrəmanın portretləri, o cümlədən iki dəfə Sovet İttifaqı Qəhrəmanı Həzi Aslanovun da portreti təqdim olunub. 

BMT-də Qələbə Günü münasibətilə tədbirlər mayın 5-də davam etdiriləcək. Belə ki, səhər təşkilatın qərargahı ərazisində "Sülh və birlik ağacı" əkiləcək. Mərasimdə BMT baş katibi Pan Gi Mun, Baş Assambleyanın sədri Sem Kutesa və BMT-yə üzv 45 ölkənin daimi nümayəndələri iştirak edəcək. Bundan sonra Baş Assambleyanın zalında II Dünya müharibəsinin başa çatmasının 70-ci ildönümü münasibətilə təntənəli iclas keçiriləcək. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi