Bakıda “Müasir Türk Rəsm Sənətində Təxəyyül, Məkan və Zaman” adlı sərginin açılışı olacaq

Bakı.12 may. REPORT.AZ/ Sabah Heydər Əliyev Mərkəzində “Müasir Türk Rəsm Sənətində Təxəyyül, Məkan və Zaman” adlı sərginin açılış mərasimi keçiriləcək. Mərkəzdən "Report"a verilən məlumata görə, Bakıda ilk dəfə təqdim olunan sərgi Türkiyə Respublikasının Mərkəzi Bankı ilə birgə təşkil edilib.

Sənətsevərlər ekspozisiyada Türkiyənin rəsm sənətinin inkişaf və dəyişmə dinamikasını izləyə biləcək.

Qeyd edək ki, Türkiyə Respublikası Mərkəzi Bankı respublikanın qurulduğu ilk illərdə mədəniyyət və incəsənətin inkişafına dəstək məqsədilə sənət kolleksiyası yaratmağı qərarlaşdırmışdı. 1930-cu illərin ikinci yarısından etibarən formalaşdırılan kolleksiya bu günümüzə qədər Türkiyə rəssamlığının görkəmli nümayəndələrinə aid əsərlərlə zənginləşdirilib. Kolleksiyadakı əsərlərin sayı artıq 900-ə çatıb və onların əksəriyyəti rəsmlərdən ibarətdir.

2003-cü ildən indiyə kimi 16 ölkədə kolleksiyanın əsərlərindən ibarət 18 sərgi təşkil olunub. ABŞ, Almaniya, Albaniya, Avstriya, Bosniya və Hersoqovina, Bolqarıstan, Kipr, Lüksemburq, Çili, İspaniya (Madrid və Barselona), Makedoniya, Niderland, Rusiya (Kazan və Ufa), Polşa, Yaponiya və Malayziyada keçirilmiş sərgilərdə müxtəlif unikal əsərlər təqdim edilib.

Sənət kolleksiyasının seçmə əsərlərindən ibarət olan “Müasir Türk Rəsm Sənətində Təxəyyül, Məkan və Zaman” sərgisi Heydər Əliyev Mərkəzində iyulun 31-dək davam edəcək.