Yanvarda Azərbaycanda tibbi sığorta üzrə ödənişlər 2,7 dəfə azalıb

Bakı. 23 fevral. REPORT.AZ/ Azərbaycanda tibbi sığorta növü üzrə daxilolmalar artıb.

“Report" Maliyyə Bazarlarına Nəzarət Palatasına istinadən xəbər verir ki, 2019-cu ilin yanvar ayı ərzində tibbi sığorta üzrə sığorta şirkətlərinin yığımları 45,604 mln manat təşkil edib. Bu, ötən ilin yanvar ayı ilə müqayisədə 5,788 mln. manat və ya 14,5% çoxdur.

2019-cu ilin yanvar ayında tibbi sığorta üzrə 2,042 mln. manat ödəniş aparılıb. Bu, 2018-ci ilin yanvar ayı ilə müqayisədə 3,459 mln. manat və ya 2,7 dəfə azdır.

Ümumiyyətlə, bu ilin ilk ayında tibbi sığorta üzrə daxilolmaların 4,48%-i ödənişə yönəldilib.

Xatırladaq ki, 2018-ci ildə tibbi sığorta üzrə sığorta şirkətlərinin yığımları 87,057 mln. manat, ödənişlər isə 59,485 mln. manat təşkil edib.