Yuxarı
    Bağlamaq

    Vergilər Nazirliyinə işə qəbul imtahanı keçirilib

    Dövlət İmtahan Mərkəzi ilə birgə təşkil olunmuş test imtahanında 1 324 nəfər iştirak edib

    Bakı. 15 aprel. REPORT.AZ/ Bu gün Vergilər Nazirliyi (VN) Dövlət İmtahan Mərkəzi ilə birlikdə ərazi vergi orqanlarında və rayon vergilər şöbələrindəki vakant vəzifələrə işə qəbulla bağlı test imtahanı keçirib.

    Bu barədə “Report”a nazirlikdən bildirilib.

    Məlumatda deyilir ki, müsabiqə elanı KİV-də, o cümlədən VN-in rəsmi internet səhifəsində, habelə “Facebook” və digər sosial şəbəkələrdəki səhifələrində yerləşdirilərək ictimaiyyətə açıq elan edilib. Elanda sənəd qəbulu, müsabiqənin keçirilməsi şərtləri və qaydaları barədə ətraflı məlumat öz əksini tapıb. Test imtahanına namizədlərin daha yaxşı hazırlaşmağına imkan yaratmaq məqsədi ilə test imtahanında istifadə olunan sualların tərtib edildiyi ədəbiyyat siyahısı nazirliyin sayt vasitəsi ilə namizədlərə çatdırılıb. Müsabiqəyə sənəd qəbulu fevralın 27-dən martın 12-nə qədər elektron ərizə formasında aparılıb.

    Müsabiqədə iştirakla bağlı 1 444 nəfər vətəndaş müraciət edib, onlardan vakant vəzifələrin tələblərinə uyğun olan 1 324 nəfəri namizəd qismində müsabiqədə iştiraka buraxılıb.

    Müsabiqə test imtahanı və müsahibə olmaqla iki mərhələdə keçirilir. Qanunvericiliyə uyğun olaraq, test imtahanında uğur qazanmış namizədlər müsahibənin ikinci mərhələsinə – müsahibəyə buraxılırlar. Müsahibələrdə namizədlərin ümumi dünyagörüşü, onların müvafiq sahədə bilikləri və onları tətbiq etmək bacarıqları yoxlanılır. Şəffaflığın təmin edilməsi üçün müsahibə kollegial şəkildə – Müsabiqə Komissiyası tərəfindən aparılır, bu zaman audio-video çəkilişdən istifadə edilir.

    Müsahibədə uğur qazanan namizədlər dövlət vergi orqanlarının ehtiyat kadrlar siyahısına daxil ediləcək və onların vakant vəzifələrə təyinatı üzrə müvafiq tədbirlər görüləcək. Müsahibənin nəticələri nazirliyin saytı vasitəsi ilə ictimaiyyətə açıqlanacaq.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi