Sahibkarlara Kömək Milli Fondunun vəsaitlərinin istifadə vəziyyəti təhlil olunub

Sahibkarlara Kömək Milli Fondunun vəsaitlərinin istifadə vəziyyəti təhlil olunub Hesablama Palatası: Müvəkkil kredit təşkilatları tərəfindən aparılmış monitorinqlər nəticəlilik və əhatəlilik baxımından tam yetərli olmayıb
Maliyyə
29 Dekabr , 2015 12:14
Sahibkarlara Kömək Milli Fondunun vəsaitlərinin istifadə vəziyyəti təhlil olunub

Bakı. 29 dekabr. REPORT.AZ/ Hesablama Palatasının növbəti kollegiya iclasında Sahibkarlara Kömək Milli Fondunun (SKMF) vəsaitlərinin formalaşması və istifadə vəziyyətinə dair analitik təhlilin nəticələri müzakirə edilib.

"Report"un Palataya istinadən verdiyi xəbərə görə, analitik təhlil Fondun vəsaitlərinin qeyri-neft sektorunun inkişafına təsir imkanları, müvəkkil kredit təşkilatlarının sahibkarlara verdiyi güzəştli kreditlərin icra vəziyyəti ilə bağlı məsələləri əhatə edib.

Auditor bildirib ki, dövlət büdcəsindən güzəştli kreditlərin verilməsi məqsədilə vəsaitlərin ayrılması ilə əlaqədar Fondun müvafiq qaydada proqnoz göstəriciləri barədə təqdim etdiyi məlumatlar tam əhatəli olmayıb.

Müvəkkil kredit təşkilatları tərəfindən müqavilə şərtlərinə bəzi hallarda riayət edilməyərək kredit, faiz və cərimə məbləğlərinin Fondun hesabına vaxtında tam ödənilməsi təmin edilməyib, bir sıra hallarda iqtisadiyyatın bu və ya digər sahələrinin inkişafı ilə bağlı nəzərdə tutulan konkret layihələrin Fondun vəsaiti hesabına maliyyələşdirilməsi məqsədilə qanunvericilikdə nəzərdə tutulan müsabiqələr keçirilməyib, ayrılmış vəsaitlərin təyinata uyğun istifadə olunması məqsədilə müvəkkil kredit təşkilatları tərəfindən aparılmış monitorinqlər nəticəlilik və əhatəlilik baxımından tam yetərli olmayıb.

Həmçinin, təhlil zamanı SKMF qarşısında öhdəliyi yaranmış müvəkkil kredit təşkilatları üzrə risk dərəcələri və xüsusi meyar göstəricilərini özündə təfsilatı ilə əks etdirən nəzarət mexanizminin hazırlanmasının, idxal asılılığı olan məhsullar üzrə nümunəvi layihələrin hazırlanaraq sahibkarlara təqdim edilməsi və onun təşviq edilməsi istiqamətində əməli tədbirlərin gücləndirilməsinin vacibliyi qeyd olunub.

Hesablama Palatasının kollegiyası analitik təhlilin nəticələrini müzakirə edərək aşkar olunmuş nöqsanların aradan qaldırılması istiqamətində qanunvericiliyə uyğun zəruri tədbirlərin həyata keçirilməsi və görülmüş işlərə dair Palataya məlumatın təqdim edilməsi barədə qərar qəbul edib və həmin qərar icra üçün İqtisadiyyat və Sənaye Nazirliyinə və SKMF-ə göndərilib.

Son xəbərlər

Orphus sistemi