Rusiya hökuməti rublun məzənnəsini tənzimləyə bilmir

Bakı. 14 aprel. REPORT.AZ/ Rusiyanın iqtisadi inkişaf naziri Maksim Oreşkin möhkəm rubla qarşı olduğunu bildirib. 

"Report" "Forexpf.ru" saytına istinadən xəbər verir ki, M.Oreşkin "bahalı rubl ölkə iqtisadiyyatının yavaşlamasına gətirib çıxa bilər", - deyib.

"İqtisadi artım üçün 2017-ci ildə risklərdən biri son aylarda tətbiq edilən sərt monetar siyasətdir. Bu siyasət - real faizlərin artırılması və rublun ciddi möhkəmlənməsinin kombinasiyasından ibarətdir. Belə bir vəziyyət ilin ortalarına yaxınlaşdıqca iqtisadi artım tempini aşağı salacaq", - nazir əlavə edib.

M.Oreşkin inflyasiyanın ciddi yavaşladığını, ilin sonuna qədər inflyasiyanın 3%-dən də aşağı düşə biləcəyini bildirib. Onun fikrincə, idxalın artması və tədiyyə balansının mövsümi pisləşməsi amili yay aylarında cari hesabın kəsirinə gətirib çıxaracaq: "Bu da rublun zəifləməsinə səbəb olacaq".

Nazirin fikrincə, neft qiymətlərinin cari səviyyəsində RUB/USD məzənnəsi 62-yə, neft 40 dollar/barelə enərsə 68-ə yüksələcək.

Qeyd edək ki, hökumətin əsas məmurlarından birinin belə bir açıqlama verməsinə baxmayaraq, rubl möhkəmlənməyə davam edir. Bu həftənin əvvəlindən RUB/USD məzənnəsi 3%-ə yaxın möhkəmlənərək yenidən 56 səviyyəsinə yaxınlaşıb. Rublun möhkəmlənməsi manatın da məzənnəsinə müsbət təsir edir.