"Report": Sabah dollar bahalaşacaq

Bakı. 24 fevral. REPORT.AZ/ Azərbaycan Mərkəzi Bankının (AMB) bu gün ABŞ dollarının fevralın 25-i üçün rəsmi məzənnəsini artıracağı gözlənilir. "Report"un analitik qrupu qeyd edir ki, bu, AMB tərəfindən bu gün keçirilən valyuta hərracında dollara olan real tələbatın tam həcmdə qarşılanmaması ilə bağlıdır.

Qeyd edək ki, bugünkü hərracda iştirak edən 14 kommersiya bankı tərəfindən toplam olaraq 66,760 mln. dolların alınması üçün sifarişlər təqdim olunub. Lakin Mərkəzi Bank satışa cəmi 30 mln. dollar çıxardığından məcmu tələbin yalnız 45%-i təmin edilib. 

Xatırladaq ki, AMB son vaxtlar hərraca 200 mln. dollar satışa çıxarırdısa, bugünkü hərraca bunun yalnız 15%-i qədər vəsait çıxarılıb. 

"Nəticədə sabah AZN/USD məzənnəsinin nisbətən yüksələcəyi gözlənilir. Bu da AMB-nin yenidən dolların möhkəmlənməsinə başlamasına qərar verməsi mənası daşıyır. Artıq sabah rəsmi məzənnənin 1,56 AZN/USD səviyyəsini üstələcəyi gözlənilir", - deyə "Report"un analitikləri qeyd edib.

Agentliyin ekspertlərinin fikrincə, dolların möhkəmlənməsini zəruriləşdirən digər amillər sırasında dünya bazarında ABŞ valyutasının güclənməsini də qeyd etmək olar: "Dollar avroya nəzərən fevralın 8-dən etibarən 3,5% möhkəmlənərək 1,098 USD/EUR-a çatıb. Bu da öz növbəsində neftin ucuzlaşmasına gətirib çıxarıb. "Brent" markalı neft dünən və bu gün 7,4% ucuzlaşaraq 32,5 dollar/barelə enib. Çin yuanı üzrə də dollara nisbətən yenidən ucuzlaşma müşahidə olunur. Fevralın 15-dən etibarən yuan 0,7% zəifləyib və dolların məzənnəsi 6,5346 CNY/USD səviyyəsinə yüksəlib".

Analitiklər hesab edirlər ki, dünya bazarında dolların möhkəmlənməsi manata da təsir edəcək: "Əsas valyuta cütlüyü sayılan USD/EUR məzənnəsinin yaxın müddətdə paritetə çatacağı, hətta bundan bir qədər aşağı enəcəyi proqnozlaşdırılır".