Yuxarı

"Report": ​FES-in uçot dərəcəsini artırması ehtimalı xeyli azalıb

Proqnoz: Dünya fond birjaları indekslərində azalma davam edəcək

Bakı. 26 yanvar. REPORT.AZ/ ABŞ Federal Ehtiyat Sisteminin (FES) 2016-cı ildə uçot dərəcəsini artırması ehtimalı qlobal maliyyə bazarlarında müşahidə olunan əlverişsiz şərait səbəbindən getdikcə zəifləyir. "Report" xəbər verir ki, FES-in 11 illik fasilədən sonra 2015-ci ilin dekabr ayında ilk dəfə uçot dərəcəsini 0,25 bənd artırmasından sonra bu il daha 4 dəfə artırma qərarı verməsi proqnozlaşdırılırdı. Lakin dekabr artımından sadəcə 1 ay müddət keçməsinə baxmayaraq, verilən proqnozlar öz aktuallığını itirməyə başlayıb. Belə ki, son 1 ayda, xüsusilə də yanvar ayının əvvəlindən etibarən dünya fond birjalarında indekslər və neftin qiyməti kəskin azalıb, bir çox ölkələrin milli valyutalarının devalvasiyası sürətlənib. Son 20 gün ərzində ABŞ-ın əsas birja indeksləri Dow-Jones 8,7% azalaraq 15 886 bəndə, Almaniyanın DAX indeksi 9,4% azalaraq 8 736 bəndə, Yaponiyanın Nikkey indeksi 11% azalaraq 16 708 bəndə, Çinin Şanxay indeksi 22,2% azalaraq 2 749 bəndə, Rusiyanın RTS indeksi isə 12,7% azalaraq 659 bəndə enib.

"Report" xəbər verir ki, FES növbəti iclası yanvarın 26-27-də keçirir və sabah FES sədri Canet Yellenin açıqlamaları gözlənilir. Açıqlamada sədrin FES-in növbəti faiz artırması barədə qərarla bağlı fikirləri yer alacaq. İqtisadçılar və analitiklərin gözləntilərini əks etdirən ABŞ-ın  bir günlük svop faizləri və FES fondlarının faiz səviyyəsi bu il ərzində heç bir faiz artımının olmayacağını göstərir. Yuanın devalvasiyası və neft qiymətlərindəki azalma səbəbindən qlobal maliyyə bazarlarında baş verən neqativ tendensiya ABŞ-ın monetar siyasətini sərtləşdirməyəcəyindən xəbər verir.

"Report"un analitik qrupu hesab edir ki, FES-in sabahkı açıqlamalarından asılı olmayaraq, qlobal bazarlar neqativ tendensiyanı bir müddət qoruyacaq. Və yalnız qlobal bazarlar müsbət tendensiyaya keçəndən sonra FES uçot dərəcəsini artıra bilər: "Hazırkı qiymətlərlə isə bu mümkün deyil. Məhz bu səbəbdən dünya fond birjalarında azalma qaçılmazdır. FES tam əksinə uçot dərəcəsini artırmaq barədə fikirlər səsləndirərsə, bu zaman, fond birjalarından ABŞ istiqrazlarına qaçış sürətlənəcək, bu da növbəti satış dalğasının başlanmasına səbəb olacaq. Yəni, sabahkı açıqlamalar qlobal bazarlar tərəfindən neqativ qəbul ediləcək. İnvestorların tədricən ABŞ-dan kənarda olan maliyyə alətlərindən imtina edərək FES-in uçot dərəcəsini artırmasını gözləyəcək".

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi