Qazaxıstan Milli Bankı "Azərbaycan Beynəlxalq Bankı" ASC-yə məxsus dövlət qiymətli kağızlarının "Vahid Təqaüd Yığım Fondu" SC-də qalan hissəsini də satıb.
“Report” bu barədə Qazaxıstan mətbuatına istinadən xəbər verir.
Xatırladaq ki, 1 sentyabr 2032-ci il tarixinə dövriyyədə olacaq qiymətli kağızların 54,36 milyard təngəyə satılması üçün apreldə 7 saziş imzalanmışdı. Bundan əvvəl mart ayında isə Milli Bank VTTF-da Azərbaycan hökumətinə məxsus 29,8 milyard təngəlik istiqrazları satmışdı.
Həmin qiymətli kağızlar Qazaxıstan fondunun investisiya portfelinə, 2014-cü ilin oktyabr ayında ABB-də yerləşdirilmiş 250 milyon ABŞ dolları məbləğində depozitin əvəzində qəbul olunub. 2017-ci il mayın 11-də ABB müflis olmasına dair ABŞ-ın Nyu-York məhkəməsinə ərizə verib və xarici öhdəliklərinə dair ödəmələrini dayandırdığını bildirərək borc öhdəliklərinin restrukturizasiyasına dair təşəbbüs irəli sürüb. Bu borcların bütövlüklə ödənilməsini Azərbaycan hökuməti üzərinə götürüb.