Yuxarı

Maliyyə Bazarlarına Nəzarət Palatasının Direktorlar Şurasının ilk iclası keçirilib

Rüfət Aslanlı Azərbaycanda maliyyə nəzarəti orqanı və maliyyə sektorunun formalaşmasının əsas hədəflər sırasına daxil olduğunu bildirib

Bakı. 30 mart. REPORT.AZ/ Bu gün Maliyyə Bazarlarına Nəzarət Palatasının Direktorlar Şurasının ilk iclası keçirilib.

Bu barədə "Report"a Palatanın İctimaiyyətlə əlaqələr sektorundan məlumat verilib.

Palatanın Direktorlar Şurasının sədri Rüfət Aslanlı ölkənin maliyyə sektorunun dayanıqlılığını təmin etmək və bu sahədə nəzarət mexanizmlərini təkmilləşdirmək məqsədilə Prezident İlham Əliyevin 3 fevral 2016-cı il tarixli fərmanı ilə Azərbaycan Respublikasının Maliyyə Bazarlarına Nəzarət Palatasının yaradıldığını diqqətə çatdırıb.

R.Aslanlı Prezident İlham Əliyevin sərəncamı ilə Maliyyə Bazarlarına Nəzarət Palatasının rəhbər vəzifələrinə təyinat almış əməkdaşları təbrik edərək, onlara gələcək fəaliyyətlərində uğurlar arzulayıb və dövlət başçısının etimadını doğruldacaqlarına əminliyini ifadə edib.

Sədr qlobal dünyada gedən iqtisadi proseslər kontekstində dünya maliyyə, iqtisadi böhranının Azərbaycana təsirini minimuma endirmək üçün maliyyə sektorunda aparılan institusional dəyişikliklərin əhəmiyyətindən söz açıb. Rüfət Aslanlı kredit təşkilatları, sığorta sektoru, qiymətli kağızlar bazarında lisenziyalaşdırma, tənzimləmə və nəzarət funksiyalarını, həmçinin çirkli pulların yuyulması və terrorçuluğun maliyyələşdirilməsinə qarşı fəaliyyət sahəsində dövlət siyasətini həyata keçirəcək Maliyyə Bazarlarına Nəzarət Palatasının qarşısında duran hədəflər barədə məlumat verib. Sədr Azərbaycanda müasir, qabaqcıl, mütərəqqi Avropa standartlarına uyğun olan maliyyə nəzarəti orqanı və maliyyə sektorunun formalaşmasının əsas hədəflər sırasına daxil olduğunu bildirib.

R.Aslanlı Palatanın nəzarət sferasına daxil olan sektorlar üzrə problemlərin dərinliyinin və miqyasının diaqnostika edilməsi, bu sahələr üzrə müvafiq strategiya və taktikaların müəyyən olunması istiqamətində tapşırıqlarını verib. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi