Yuxarı

​Azərbaycanda həyat sığortası bazarı 15% artıb

Bu sahədə həyata keçirilən ödənişlərin həcmi isə 59% artıb

Bakı. 30 dekabr. REPORT.AZ/ Bu ilin yanvar-noyabr aylarında Azərbaycanda toplanmış sığorta haqlarının 26,1%-i və yaxud 105,3 mln. manatı həyat sığortasının payına düşüb. Ötən ilin eyni dövrü ilə müqayisədə həyat sığortası bazarı 14,8% böyüyüb.

"Report"un Azərbaycan Sığortaçılar Assosiasiyasına istinadən verdiyi xəbərə görə, həyat sığortasındakı yığımların 59,2%-i və yaxud 62,3 mln. manatı həyatın yaşam sığortası, 27,1%-i və yaxud 28,6 mln. manatı istehsalatda bədbəxt hadisələrdən sığorta, 12,3%-i və yaxud 12,9 mln. manatı həyatın ölüm halından sığortası, 1%-i və yaxud 1,1 mln. manatı əmək qabiliyyətinin sığortası, cəmi 0,3%-i və yaxud 390 min manatı isə sağalmaz xəstəliklərdən sığortanın payına düşüb.

Hesabat dövründə həyat sığortası üzrə həyata keçirilmiş ödənişlərin məbləği isə 42,7 mln. manat təşkil edib. Bu da ümumi ödənişlərin 27,1%-ni təşkil etməklə, 2014-cü ilin eyni dövrünə nisbətən 59,2% çoxdur.

Həyat sığortası üzrə ödənişlərin 90,6%-i və yaxud 38,7 mln. manatı həyatın yaşam sığortası, 4,7%-i və yaxud 2 mln. manatı istehsalatda bədbəxt hadisələrdən sığorta, daha 4,7%-i və yaxud 2 mln. manatı həyatın ölüm halından sığortası, cəmi 13,7 min manatı isə sağalmaz xəstəliklərdən sığortanın payına düşüb.

Təhlil olunan dövrdə həyat sığortası bazarında toplanmış hər 100 manat sığorta haqqı müqabilində 40,6 manat ödəniş edilib. Keçən ilin yanvar-noyabr aylarında isə bu rəqəm 29,3 manat olub.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi