Yuxarı

Hesablama Palatasının əməkdaşları ECOSAI-ın seminarında iştirak edib

Hesablama Palatasının əməkdaşları ECOSAI-ın seminarında iştirak edib

Türkiyədə İqtisadi Əməkdaşlıq Təşkilatına üzv dövlətlərin ali audit qurumlarının təmsil olunduğu ECOSAI təşkilatı tərəfindən “Etikanın auditinə giriş” mövzusunda keçirilmiş praktik seminarda Hesablama Palatasının İcmal-analitik şöbəsinin aparıcı məsləhətçisi Tamerlan Yusif-zadə və Dövlət büdcəsi gəlirlərinin auditi şöbəsinin aparıcı məsləhətçisi Tural Cahangirli iştirak ediblər.

Palatdan “Report”a verilən məlumata görə, sminarda təşkilata üzv olan və olmayan 13 ölkənin ali audit qurumunun 28 təmsilçisi iştirak edib.

Seminarı Türkiyə Hesablama Məhkəməsinin və ECOSAI-ın sədri Seyid Ahmed Baş giriş sözü ilə açıq elan etmiş və tədbir haqqında qısa məlumat verib.

Seminar Türkiyə Hesablama Məhkəməsinin təmsilçiləri və EUROSAI-ın “Audit və Etika” xüsusi qrupunun sədri Helena Abreu Lopez tərəfindən aparılıb. Tədbirin gedişatında etikanın auditi sahəsində əsas anlayışlar və təriflər, etika auditinin keçirilməsinin məqsədi, bu auditin qurulması (o cümlədən mövzuların seçilməsi, auditin forması, auditin predmeti, auditin meyarları, məlumat toplama metodları), auditin həyata keçirilməsi, audit hesabatının hazırlanması və ona tələblər mövzuları üzrə təlimlər keçirilmiş, hər bir mövzu üzrə praktik məsələlər qoyularaq müzakirələr aparılmış, təkmil təcrübə barədə nümunələr təqdim edilib.

Praktik seminarın son günündə Hesablama Palatasının nümayəndəsi seminarın mövzusu üzrə təqdimat edərək etikanın auditi ilə bağlı Hesablama Palatasının mandatı, dövlət sektorunda etik münasibətləri tənzimləyən mövcud normativ-hüquqi baza, tətbiq edilə bilən audit meyarları, nəzarət tədbirlərində etika məsələlərinə dair Hesablama Palatasının tövsiyələri barədə məlumat verib.

Yekunda praktik seminarın nəticələri barədə məlumat verilib, iştirakçıların tədbir haqqında rəyləri dinlənilib və “Etikanın auditinə giriş” mövzusu üzrə praktik seminarın sertifikatları iştirakçılara təqdim edilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi