Bakı. 11 noyabr. REPORT.AZ/ Dünya bazarında neft qiymətinin düşməsi 2014-cü ildə Azərbaycanın iqtisadi artım tempini 2,8 faiz bəndi azaldıb. Belə ki, 2013-cü ildə iqtisadi artım tempi 5,8% olub. "Report" xəbər verir ki, bu barədə Avropa Yenidənqurma və İnkişaf Bankının (EBRD) hazırladığı "Transition report 2015-2016" hesabatında məlumat verilib.
Hesabata görə, Azərbaycanın qeyri-neft sektorunda da inkişaf 2014-cü ildə əvvəlki ilə nisbətən zəifləyib. Bu ilin ilk 9 ayında ÜDM-in artımı 3,7% təşkil edib və ÜDM-də qeyri-neft sektorunun payı 6,4 faiz bəndi artıb.
EBRD 2015-ci il üçün Azərbaycanda ÜDM artımının 3%, inflyasiyanın 5% civarında olacağını açıqlayıb. Qeyd edək ki, ötən il ÜDM artımı 2,8%, inflyasiya isə 1,4% olub.
EBRD həmçinin bu il ÜDM-də dövlət sektorunun payının 7,9 faiz bəndi azalacağını, cari hesab balansının həcminin isə 3% artacağını proqnozlaşdırdığını elan edib. Azərbaycan iqtisadi artımında birbaşa xarici investisiyaların (FDI) payı isə 3 faiz bəndi azalacaq.
Azərbaycan Mərkəzi Bankının (AMB) valyuta ehtiyatları ilə bağlı məsələlərə toxunan bank ötən ilin noyarında AMB-nin konvertasiya olunmuş valyuta ehtiyatlarının 13,2 mlrd. ABŞ dolları olduğunu, apreldə isə onun 4,4 mlrd. dollara düşdüyünü açıqlayıb. Avqustda isə bu rəqəm 5,3 mlrd. dollara qədər artıb.