Yuxarı
    Bağlamaq

    "Creditinfo": Bankların inkişafı üçün kredit bürosu MKR xidmətindən daha əhəmiyyətli olacaq - MÜSAHİBƏ

    ​Azərbaycanın ilk özəl kredit bürosunun əsas səhmdarı olan İslandiya şirkətinin təmsilçisi Paul Randel Reporta müsahibə verib

    Bakı. 9 dekabr. REPORT.AZ/ Azərbaycanın ilk özəl kredit bürosunun 51%-lik səhmdarı - İslandiyanın "Creditinfo" şirkətinin biznesin inkişafı üzrə direktoru Paul Randel “Report”a müsahibə verib:

    - Təmsil etdiyiniz şirkət Azərbaycanın maliyyə bazarına hansı yenilikləri gətirəcək?

    - “Creditinfo” ilk növbədə bu sahədə topladığı zəngin təcrübəni Azərbaycanda yerli şəraitə uyğunlaşdırmaqla tətbiq edəcək. Bəzi qonşu dövlətlər artıq bu təcrübədən faydalanıb. Biz daim işimizi təkmilləşdiririk, müasir texnologiyalardan istifadə edirik, yeni əlavə dəyər məhsulları yaradırıq. Məsələn, onlardan biri həyəcan siqnalıdır ki, maliyyə xidmətlərinin göstərilməsində böyük əhəmiyyət kəsb edir.

    - Bu məhsulun mahiyyəti nədir?

    - Məsələn, hər hansı şəxs bir bankdan kredit götürür, bu zaman bağladığı kredit müqaviləsində digər banklarla münasibətlərinə dair müəyyən şərtlər nəzərdə tutulur. Əgər müştəri həmin şərtləri digər banklarda kredit götürən zaman pozarsa, dərhal həyəcan siqnalı ilə ilk banka bu barədə məlumat verilir.

    - Azərbaycanda Maliyyə Bazarlarına Nəzarət Palatasının (MBNP) nəzdində Mərkəzləşdirilmiş Kredit Reyestri (MKR) Xidməti mövcuddur və yerli banklar aktiv şəkildə onun xidmətindən istifadə edir. İlk özəl kredit bürosunun yaranması MKR arayışlarına tələbatı azalda bilərmi?

    - MBNP özəl kredit büroları haqqında qanun layihəsinin hazırlanmasına, qəbuluna, ilk büronun təşkilinə aktiv şəkildə dəstək verib. Hesab edirəm ki, MKR xidməti Palatanın nəzarət funksiyalarının həyata keçirilməsində bundan sonra da vacib rol oynayacaq, daha çox bank nəzarəti mexanizmi kimi istifadə olunacaq. Bankların inkişafı, onların riskləri daha düzgün qiymətləndirməsi üçün isə kredit bürosunun fəaliyyəti daha çox əhəmiyyətli olacaq.

    - Büro nə vaxt fəaliyyətə başlayacaq? Bu, kommersiya layihəsi kimi özünü nə dərəcədə doğruldandır? Lazımi infrastrukturun yaradılmasına çəkilən xərclər hansı müddətdə səhmdarlara geri qayıdır?

    - Kredit büroları ilə qanunvericilik bazasının formalaşmasından sonra təxminən 6-12 ay lazımdır ki, büro fəaliyyətə başlasın. Onun yaradılmasına çəkilən xərcləri isə 3-5 ilə geri qaytarmaq mümkündür. Sevindirici haldır ki, bunun sayəsində xarici investorlar Azərbaycanın maliyyə bazarına yatırım edir.

    - Azərbaycanın kredit təşkilatları MKR xidmətindən bir dəfə istifadəyə görə 1 manat ödəyir. Kredit bürosu üçün hansısa ilkin tariflər məlumdurmu?

    - Tariflər barədə büronun təsis edilməsindən sonra danışa bilərik. Bununla bağlı qərarı Müşahidə Şurası və yaxud İdarə Heyəti qəbul edəcək. Hələlik onu deyə bilərəm ki, kredit bürosu kredit tarixçəsi də daxil olmaqla müxtəlif məhsul və xidmətlər təklif edəcək, buna uyğun olaraq müxtəlif tariflər tətbiq olunacaq.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi