Bakı. 14 yanvar. REPORT.AZ/ “Kapital bazarlarının müasirləşdirilməsi Layihəsi" çərçivəsində “Kapital bazarı infrastrukturunun müasirləşdirilməsi və avtomatlaşdırılması” komponenti üzrə əldə edilmiş vahid Ticarət, post-ticarət və nəzarət platforması üzrə "Bakı Fond Birjasının (BFB) yeni ticarət sistemi" mövzusunda BFB-nin üzvləri üçün nəzərdə tutulmuş təlimlərə start verilib.
"Report"un Birjaya istinadən verdiyi xəbərə görə, təlimlər Koreya Birjasının mütəxəssisləri tərəfindən BFB əməkdaşlarının iştirakı ilə həyata keçirilir.
Təlimlər zamanı BFB-nin yeni ticarət sistemin funksionallığı, iş prinsipi, yeni ticarət imkanları, eyni zmanada BFB-də ticarət əməliyyatlarında iştirak üçün nəzərədə tutulmuş xüsusi proqram təminatında iş qaydalarının tədrisi nəzrədə tutulub.
Təlimlər ümumi tanışlıq və praktiki məşğələlər daxil olmaqla yanvarın 15-də davam edəcək. Daha sonra təlimlər Birja üzvlərinin bilavasitə iş yerlərindən davam etdiriləcək.
Xatırladaq ki, Layihənin 2016-cı ilin fevral ayına qədər davam edəcək bu mərhələsi ərzində QKDK, Milli Depozit Mərkəzi və BFB-nin mütəxəssisləri ilə birlikdə proqram təminatının sınaq işləri, eyni zamanda Koreya Birjasının əməkdaşları tərəfindən sistemlər üzər yerli mütəxəssislərə istifadəçi təlimləri keçiriləcək.
Qeyd edək ki, qiymətli kağızlarlarla vahid Ticarət, post-ticarət və nəzarət sisteminin 2016-cı ilin birinci yarısında istifadəyə veriləcəyi planlaşdırılıb.